Оонньууру уорбут оҕону туттулар

ИДьМ Дьокуускайдааҕы 3-с №-дээх полиция салаатын дьуһуурунай чааһыгар оонньуур атыылыыр маҕаһыынтан үҥсүү киирбит.

Ол курдук маҕаһыынтан 10 тыһ.солкуобай суумалаах оонньууру уорбуттар. Суһал-ирдиир уонна сааһын ситэ илик оҕолор дьыалаларынан дьарыктанар иниспиэксийэ үлэһиттэрэ 15 саастаах уорбаланааччыны туппуттар. Оҕо төлөммөтөх табаары маҕаһыынтан илдьэ тахсыбыт. Онно биллибитинэн, кини биллэр фирма конструктордарын массыыналарын мунньар эбит. Уорбаланааччы  камераҕа көстүбэт сири булан баран, икки конструкторы уорбут. Уоруллубут оонньуур төннөрүллүбүт.

Арассыыйа Федерациятын холуобунай кодексатын 158 ыст. 1 ч. «Уоруу» диэнинэн холуобунай дьыала тэриллибит. Бу туһунан ИДьМ пресс-сулууспата иһитиннэрэр.