Опера-балет бэстибээлин айар киэһэлэригэр ыҥыраллар

Дьокуускай куоракка алтынньы 17-31 күннэригэр ыытыллар “Чайковский-фест. Якутск” опера-балет бэстибээлигэр  Мариинскай уонна Улахан тыйаатыр, ону сэргэ Суорун Омоллоон аатынан Опера уонна балет тыйаатырын сүрүн артыыстара кыттыахтара.

 

Ону сэргэ, бэстибээл чэрчитинэн буолар айар көрсүһүүлэргэ классическай ускуустубаны сыаналааччылар  уһулуччулаах толорооччулары кытары аһаҕастык кэпсэтиэхтэрин, сүбэ-ама ылыахтарын, ыйытыыларыгар харда ылыахтарын  сөп.

Ол эбэтэр Мариинскай тыйаатыр солиһа Глеб Перязевы (бас), Улахан тыйаатыр солиһа Алексей Татаринцовы (тенор), Улахан тыйаатыр солистката Агунда Кулаеваны, Мариинскай тыйаатырга балет солисткатын Мария Буланованы кытары көрсүһүөхтэрэ.  Д.Сивцев-Суорун Омоллоон аатынан Опера уонна балет тыйаатырыттан  айар көрсүһүүлэргэ Арассыыйа уонна СӨ үтүөлээх артыыската Екатерина Тайшина,  СӨ норуодунай артыыһа Сарыал Афанасьев, СӨ үтүөлээх артыыската Мария Кузьмина кыттыахтара.

Маннык көрсүһүүлэр көрөөччүлэргэ, ол иһигэр  үрдүк уонна орто үөрэх кыһаларын преподавателларыгар уонна  устудьуоннарыгар, ускуустуба оскуолатын үөрэнээччилэригэр, кинилэр төрөппүттэригэр, эдэр артыыстарга кэрэхсэбиллээх буолуоҕа.

Култуура көҕүлээһиннэригэр бэрэсидьиэн пуондатын өйөбүлүнэн олоххо киллэриллэр бырайыак чэрчитинэн тэриллэр көрсүһүүлэргэ анал аудиторияҕа аналлаах маастар-кылаастар ыытыллыахтара.

Ити курдук, чугастык сэһэргэһии, алтыһыы бэстибээл биир умнуллубат түгэнинэн буолуоҕа.

Эһигини барыгытын ускуустуба бырааһынньыгар ыҥырабыт.

 

Көрсүһүүлэр күннэрэ-дьыллара:

Алтынньы 20 күнүгэр  18.30  ч.  Опера уонна балет камернай саалатыгар – Глеб Перязев;

Алтынньы 21 күнүгэр 17.30 ч. балет оскуолатыгар оҕо тыйаатырыгар – Екатерина Тайшина;

Алтынньы 22 күнүгэр  17.30 ч. балет оскуолатыгар оҕо тыйаатырыгар – Сарыал Афанасьев уонна  Мария Кузьмина;

Алтынньы 27 күнүгэр  18.30 ч. Опера уонна балет тыйаатырын камернай саалатыгар  – Татьяна Павловская;

Алтынньы 28 күнүгэр  18.30 ч. Опера уонна балет тыйаатырын камернай саалатыгар  – Алексей Татаринцев;

Алтынньы 29 күнүгэр  17.00 ч. Опера уонна балет тыйаатырын камернай саалатыгар  – Агунда Кулаева;

Алтынньы 30 күнүгэр  13.00 ч. балет оскуолатыгар оҕо тыйаатырыгар  – Мария Буланова.

Опера уонна балет тыйаатырын пресс-сулууспата