Хаартыска: ааптар түһэриилэрэ
2026 сылга Арассыыйа тыйаатырдарын диэйэтэллэрин сойууһа төрүттэммитэ 150 сылын бэлиэтиир. Ол туһунан өссө 2024 сыл олунньу 26 күнүгэр РФ бэрэсидьиэнэ Владимир Путин Ыйааҕа тахсыбыта.
Оттон тохсунньу 17 күнэ — нуучча драматическай тыйаатырын төрүттээччи, тыйаатыр аатырбыт режиссера, артыыс, педагог, ССРС бастакы норуодунай артыыһа Константин Станиславскай төрөөбүт күнэ (1863 с.).
Дойдуга аан бастаан бэлиэтэнэр Артыыс күнүгэр, тохсунньу 17 күнүгэр, Суорун Омоллоон аатынан Опера уонна балет тыйаатыра бэйэтин көрөөччүлэригэр И.Кальман «Сильва» опереттатын бэлэх уунна.
Артыыстары уонна көрөөччүлэри СӨ култуураҕа уонна духуобунай сайдыыга миниистири солбуйааччы Марина Силина, Опера уонна балет тыйаатырын дириэктэрэ Владислав Левочкин уонна СӨ Тыйаатырдарын сойууһун бэрэссэдээтэлэ Айаал Аммосов эҕэрдэлээтилэр.
Марина Силина РФ Тыйаатырдарын сойууһун диэйэтэллэрин көҕүлээһиннэринэн баар буолбут саҥа бырааһынньык күн Опера уонна балет тыйаатырын улахан кэлэктиибэ тапталын, талаанын көрөөччүгэ бэлэхтиирэ ураты суолталааҕын бэлиэтэтэ.
«Биһиги тыйаатырбыт өрөспүүбүлүкэҕэ биир саамай улахан тыйаатырынан биллэр. Баҕар, биһиги аркыастырбыт артыыстарын сирэй билбэккит буолуо. Ол гынан баран, аркыастыра суох биһиги биир да испэктээкпит турбат. Биир саамай киэн туттуубутунан хуорбут буолар. Биһиги операбыт, балеппыт артыыстарынан бары киэн туттабыт. Балет артыыстара быйыл үс «Кыһыл көмүс маасканы» ылбыттарын курдук көстүү ханнык да тыйаатырга суоҕа буолуо. Бүгүҥҥү туруорууга артыыстарбыт бары кэриэтэ кытталлар», -– диэн Владислав Левочкин тыйаатырын кэлэктиибигэр эҕэрдэтин уонна махталын тириэртэ.
Айаал Аммосов артыыс хайдахтаах курдук дьиктилээхэй идэ буоларын бэлиэтээн туран, бу күн артыыстары хаһааҥҥытааҕар да дохсун ытыс тыаһынан көрсөргө ыҥырда уонна Тыйаатыр диэйэтэллэрин сойууһун Грамотатынан артыыстары Екатерина Корякинаны (опера), Власий Кондаковы (хуор), Афанасий Герасимовы (аркыастыр), Динара Гасанбалаеваны (балет) наҕараадалаата.
х х х
Көрөөччү сүргэтин көтөҕөр муусукалаах, көрүдьүөс түгэннэри дьүһүннээн көрдөрөр уонна чаҕылхай сыаналардаах «Сильва» оперетта таптал күүһүн, имэҥин, тапталтан хомойууну-хоргутууну, киһи аймах атын да сыаннастарын көрдөрөр.
Икки көстүүлээх «Сильва» оперетта сүрүн режиссера -– СӨ култууратын туйгуна Татьяна Саввинова, уус-уран салайааччы уонна сүрүн дирижер -– СӨ ускуустубатын үтүөлээх диэйэтэлэ Павел Васьковскай.
Сүрүн оруолларга:
Сильва Вареску -– СӨ култууратын туйгуна, норуоттар икки ардыларынааҕы куонкурустар лауреаттара Зинаида Колодезникова, кинээс Эдвин -– норуоттар икки ардыларынааҕы куонкурустар лауреаттара Александр Степанов, Бони, граф Кончиану -– СӨ култууратын туйгуна, норуоттар икки ардыларынааҕы куонкурустар лауреаттара Алексей Иванов, Стасси -– СӨ култууратын туйгуна, норуоттар икки ардыларынааҕы куонкурустар лауреаттара уонна дипломана Мария Михайлова уо.д.а.
Сарсын, тохсунньу 19 күнүгэр – Кириһиэнньэ. Бу күн туох көҥүллэнэр, бобуллар? Кириһиэнньэнэн күнү-дьылы хайдах билгэлииллэр?…
2000 сыллар саҥаларыгар төрөппүттэрим кыһын куоракка айаннаан иһэн суолга моһуогурбуттара. Онуоха амарах санаалаах Нуораҕана дьоно өрүһүйэн, аҕам түүннэри гарааска массыынатын оҥостон, киин сири булбуттарын саныыбын.…
Кириһиэнньэ – итэҕэллээхтэр 12 сүрүн бырааһынньыктарыттан биирдэстэрэ. Арассыыйаҕа тарҕаммыт былыргы үгэһинэн православнай итэҕэллээх дьон тохсунньу…
Бу күн халлаан куйаарыгар олус интэриэһинэй түгэн үөскүүр. Чуумпуну, бигэ туругу сөбүлүүр Ый Оҕус бэлиэтигэр…
Саха сирин синоптиктарын сабаҕалааһыннарынан, бүгүн, тохсунньу 18 күнүгэр, өрөспүүбүлүкэ соҕуруу, арҕаа, хотугулуу-арҕаа өттүгэр уонна Арктика…
Хас биирдии үүнээйи туспа ааттаах-суоллаах, суолталаах. Уопуттаах оҕуруотчуттар ханнык сибэккини дьиэҕэ олордору, ханныгы олордуллуо суохтааҕын…