Билигин тохтобуллары көннөрү ыраастыыллар, бөҕүн хомуйаллар, үрдүттэн хаарын түһэрэллэр. Онтон муус устарга сылаас күн-дьыл турдаҕына, уу тоҥмот буоллаҕына, аһаҕас тохтобуллары кылбаччы сууйуохтара-сотуохтара.
Уһун кыһын устата тохтобуллар быылынан бүрүллэн, киртийэн тураллар. Тохтобуллар дьэҥкир былаастык буоланнар, кир-хох да сыстыбыта дьэҥкэтик көстөн турар. Оттон ырааһырдаҕына, дьэ, тупсаҕай, сырдык көстүүлэнэр.
Ол курдук, Ленин проспегар бастаан суруйааччы Былатыан Ойуунускай, бастакы бэрэсидьиэн Михаил Николаев, космофизик-учуонай Юрий Шафер, долган суруйааччыта Огдо Аксенова бэргэн этиилэрин сахалыы, нууччалыы тылынан суруйбуттара.
Бу курдук бэргэн этиилэри өссө 50 тохтобулга суруйбуттара. Оптуобус күүтэн туран, киһи биллэр диэйэтэл туһунан, бэргэн этиитин ааҕар, толкуйдуур, үөрэнэр, билиитэ кэҥиир.
Маны тэҥэ, тохтобулларга оптуобустар сырыыларын каартата ойууланар.