Оптуобус утары баран иһэр көлөҕө кэтиллибит

Халлаан хаардаан баран ириэрбитин түмүгэр, суолга халтараан бөҕө буолбут. 

Бүгүн, алтынньы 10 күнүгэр, «Өлүөнэ» федеральнай суол 558-с км-гэр (Нерюнгри уонна Алдан икки ардыгар) 30 саастаах суоппар ГАЗ оптуобуһу ыытан иһэн,  халтараан суолу учуоттаабакка, баран иһэр улахан самосвал көлөҕө кэтиллибит. Оптуобуска олорсон иһэр 10 киһиттэн 5-һэ араас хабааннаах эчэйиини ылбыт уонна амбулаторнай эмтэниини ааһыахтара. Икки көлө суоппардара аһыы утаҕы испэтэхтэр. Пассажирдар бары анал куру баанан олорбуттар. Билигин тустаах бэрэбиэркэ барар.  ГАИ үлэһиттэрэ бу ириэрии, халтараан кэмигэр суоппардар адьас болҕойон, сэрэхтээхтик айанныылларыгар, оттон пассажирдар анал куру бааналларыгар сүбэлииллэр.