Оптуобуска биэстээх оҕону буллулар

Бэҕэһээ, атырдьах ыйын 28 күнүгэр, Дьокуускай куорат маршрутнай оптуобуһугар төрөппүт арыаллааһына суох биэстээх оҕо соҕотох сылдьарын буллулар. Бу туһунан ИДьМ Дьокуускайдааҕы салаатын пресс-сулууспата иһитиннэрэр.

Ол курдук, 18-c №-дээх оптуобуска биэстээх оҕо соҕотох сылдьарын суоппар бүтэһик тохтобулга тиийэн баран өйдөөн көрбүт. Кини тута оҕону чугастааҕы маҕаһыыҥҥа илдьэн биэрбит, маҕаһыын үлэһиттэрэ полицияҕа эрийбиттэр.

Полиция үлэһиттэрэ оҕону полиция салаатыгар илдьибиттэр. Онно биллибитинэн, оҕо сарсыарда табаарыһын кытта оонньуу тахсыбыт уонна уччуйан уопсастыбаннай тырааныспарга олорсубут.

Оҕону ийэтигэр тиксэрбитэр. РФ административнай быраабы кэһии кодексатын 5.35 ыст. ийэҕэ административнай боротокуол толоруллубут.