Оптуобуска тахсыбыт айдаанынан бэрэбиэркэ саҕаланна

Социальнай ситимҥэ Дьокуускай куорат маршрутнай оптуобуһун иһигэр тахсыбыт айдаан киэҥник тарҕанна.

Ол курдук, оптуобуска олорсон испит дьахтар суоппары быдьар тылынан үөҕүүтүн дьон видеоҕа устубут. Айдааҥҥа үһүс киһи кыттыһан дьахтары буойа сатаабыт. Бу кэмҥэ суоппар видеоҕа усталларын көрөн ыйыппыт. Онуоха бу уһуллубут видео полицияҕа тиийэн сөбүн туһунан устааччы иһитиннэрбит.

Киһини уопсастыбаннай миэстэҕэ быдьардык үөхпүтүн иһин административнай эппиэтинэскэ тардыллыахха сөп.

ИДьМ пресс-сулууспата иһитиннэрбитинэн, Дьокуускай куорат 3-с №-дээх полиция салаатыгар  Дьокуускай куорат 17 саастаах  олохтооҕо үҥсүү түһэрбит. Ол үҥсүүгэ кинини билбэт дьахтара маатыралаан үөхпүтүн туһунан суруйбут. Билигин бу дьыаланан бэрэбиэркэ үлэтэ саҕаламмыт.