Хаартыска: pxhere.com/ru/photo саайтан.
Өҥүрүк куйаас сатыылаан турдаҕына сарсыардаттан куорат тэрилтэлэрин кэрийэн, ыдьырыйа сылайдарбын даҕаны, син наадабын ситэн, дэриэбинэҕэ тахсар 2 чаастаах оптуобуска салбыҥнаан кэллим. Күн уотуттан килиэби да буһарыахха сөптөөх буола итийбит оптуобуска бэркэ үтүрүһэн “бу да оҕонньор, анньыһан түһэн” диэн мөҕүллэн-хайаан арыычча киирдим ээ. Оҕонньор диэбиттэригэр төрүкү да кыһамматым.
Хата, миэстэҕэ тиксэн, улугура сылайбыт бэйэм даххаһыйан кэбистим. Оптуобус иһэ элбэх дьон суоһуттан эбии буһугурда. Үөһэ лүүктэри аһан лиһигирэтэр тыастара иһилиннэ. Куорат сыырын өрө сыылларан тахсан баран дэриэбинэлиир суол сүнньүн туттубут. Эргэ оптуобус ааннарын тыаһа хас оҥхойу аахтара халыр-талыр гынар тыаһыгар бигэнэн нухарыйан эрдэхпинэ эмискэ үрдүбэр дьахтар хатан куолаһа чаҕаарыйа түстэ: “Молодой человек, уступайте место, пожалуйста”.
Ыараабыт халтаһаларбын күүһүм муҥунан өрө анньаат “бууттаах” төбөбүн көтөҕө астым. Көрбүтүм, кырааскалаах уостарын сүр дьэбирдик ньимиччи туттубут 50-лаах нуучча дьахтара миигин суостаахтык тобулу көрөн турар эбит. Мин мах бардым. Онтон, бу оҕобор тэҥнээх бытааһах эчи омунун, баатыгырын, оонньоон этэр дуу, хайдах, били, киирэр ааҥҥа “оҕонньордообуттара” этэ дии диэн санаат, иккистээн хоҥкуйан эрдэхпинэ “Ну!” диэн тымныы тылтан дьиһигис гына түстүм.
Ол эрэн өһүргэнэ быһыытыйдым. Тохтуоҥ ээ диэн дьиппинийэн кэбиһээри гынан баран “Бэйи, молодой человек” диэтэ дуу диэн сэҥээрэ быһыытыйдым. Дьахтарым бэрди эттим диэбэтэ быһыылаах, тимир тириитин кэтэн баран турар. Оптуобус иһэ им-дьим. Бэрт миигин бэркэ билэр дьон маннык сыһыантан бэркиһээтилэр быһыылаах.
Мин “молодой” киһи быһыытынан (хантан күүс киирбитэ буолла) тура эккирээтим.
“Пожалуйста” диэҥҥэ маарынныыр тылы баллыгыраан эрдэхпинэ дьахтар олоро биэрдэ.
Айаммыт онтон бытаарбата, ол эрээри, били, дьахтарым чугастааҕы Үҥкүр сэлиэнньэтигэр түһэн эрэрин көрөн хааллым. Итиччэ чугаска айанныыр эрээри… диэн мөҕүттэ быһыытыйан иһэн “молодой человек” диэн тыллар өрөгөй ырыатын курдук испэр хатыланан уоскуйа быһыытыйдым.
Көр, ардыгар хаҕыс сыһыантан туох эрэ үчүгэйи сүһэн ылар бэрт ээ. Эдэр киһи аатыран эгди буоллаҕым үһү.
Александр БИРИ.
Сотору кэлэр сыллааҕы өрөспүүбүлүкэ бүддьүөтэ ылыллаары турар. Онтон сиэттэрэн өрөспүүбүлүкэ үбүн миниистирин э.т. Иван Алексеев…
Алтынньы 14 күнүгэр Дьокуускайга уопсастыбаннай уонна бэлитиичэскэй диэйэтэл Владимир Михайлович Членов мемориальнай дуоскатыгар сибэкки дьөрбөтүн…
Бу сыл саҕаланыаҕыттан Саха сиригэр 24 булт саата сүтүүтүн түбэлтэтэ бэлиэтэннэ. Бас билээччилэр эппиэккэ тардылыннылар.…
Сыл саҕаланыаҕыттан «Аҕа дойдуну көмүскээччилэр» судаарыстыбаннай пуонда Саха сиринээҕи филиалын көмөтүнэн байыаннай дьайыылар бэтэрээннэрэ уонна …
Бу күннэргэ С.А. Новгородов аатынан Чурапчы орто оскуолатыгар «Судостроение» хайысхалаах кылаас үөрүүлээх быһыыга-майгыга аһылынна. Кылаас…
Дьокуускай куорат олохтооҕо Ис дьыала министиэристибэтэ үлэҕэ ылыыттан аккаастаабытынан суукка үҥсэн тиийбит. Эр киһи туох…