Оптуобустар эбиллиэхтэрин оннугар маршруттара уустугурда

Дьокуускай куорат ДСК оройуонун олохтоохторо оптуобус маршруттара уларыйбытыттан айманаллар. Айманаллара да оруннаах.  Олохсуйбут маршруттар кыстыгы көрсө  уларыйан, дьон күннээҕи олоҕор уустугу үөскэппиттэр.

Бу туһунан  олохтоохтор социальнай ситимнэрин бөлөҕүттэн аҕам саастаах Светлана Ильинична санаатын үллэһиннэ:

— Биһиги 16-c оптуобуһунан уһун сыллар усталара айаннаан кэлбиппит. Поликлиникабытыгар да барарбытыгар судургу этэ. Оруобуна поликлиника иннигэр тиийэн тохтуур этэ. Куораппыт дьаһалтата саҥа маршруттары аһан сырыыны кэҥэтиэн оннугар олохсуйбут маршруттары  уларытан-тэлэритэн эрэй бөҕө буоллубут. ДСК оройуона кэҥээтэ, «Сулустаах» түөлбэнэн киирэн тахсар оптуобустар «Прометейга» туолан тиийэллэрэ чахчы. Дьиҥэр, улахан түөлбэлэргэ туһунан маршруттар наадалар. Аны ДСК оройуонуттан быһалыы Покровскай трагынан айаннаан ГРЭС-кэ тиийэр маршрут төрүкү суоҕа. Барыта киин эрэ уулуссанан хос-хос эргийэр, биир көнө суолу тутар маршрут суох. Оптуобуһунан сылдьааччыларга оптуобус маршрута судургу буолуохтаах.

Бэлиэтээн суруйдахха, кэлэр нэдиэлэттэн  Дьокуускайга 2, 4, 5,6, 7, 12,14,16,19,35 оптуобус маршруттара уларыйыахтаах. Бу оптуобустар саҥа хайысханан сылдьыахтара.