Оптуобустар сэтинньиттэн Ленин проспегынан сылдьыахтара

Оптуобус маршруттара Дьокуускай киин уулуссатыгар сэтинньи ыйтан саҕалаан төннүөхтэрэ. Бу туһунан «Главстрой» МКУ дириэктэрэ Алексей Варламов биллэрдэ.

Кини этэринэн түһэриллибит хантараакка Ленин проспега сэтинньи 31 күнүгэр диэри түмүктэниэхтээх диэн болдьох ыйыллыбыт.

“Оптуобустары сэтинньи ортотуттан ыытан саҕалыыр былааннаахпыт. Ол кэмҥэ уулусса сырдатыыта, светофор үлэтин таҥыы, итиэннэ тохтобул павильоннара бэлэм буолуохтаахтар”, — диэтэ Алексей Варламов.

Билигин сорох тутуу матырыйаала айаннаан иһэрэ биллэр. Ититиилээх уонна тымныы тохтобуллар, сырдатыыны салайар пультар балаҕан ыйын бүтүүтэ тиэйиллэн кэлиэхтээхтэр.