Оптуобустар улуустарга сырыылара тоҕо тохтоото?

СӨ Тырааныспарга уонна суол хаһаайыстыбатыгар миниистирэ Владимир Сивцев «Якутия 24» ханаалга «Актуальное интервью» биэриигэ муниципальнай тэриллиилэр икки ардыларынааҕы оптуобус маршруттарын быстах кэмҥэ тохтотуу туһунан иһитиннэрдэ.

Алтынньы 21 күнүттэн 2025 сыл бүтүөр диэри  201 №-дээх «Дьокуускай — Покровскай — Мохсоҕоллоох»,  202 №-дээх «Дьокуускай — Бэрдьигэстээх», 203 № -дээх «Дьокуускай — Нам — Хатырык» уонна  206 №-дээх «Аллараа Бэстээх — Чурапчы» маршруттарга сырыы тохтотуллар.

Миниистир бу быһаарыы бырабыыталыстыба дуогабардарын болдьоҕо бүппүтүнэн уонна кинилэри уһатарга ситэри үбүлээһин суоҕунан сибээстээх диэн быһаарда. Кини тохтотуу күһэллиилээх уонна быстах кэмҥэ буоларын бэлиэтээтэ.

«Бу маршруттар кэлэр сылтан саҕалаан үлэлэрин саҕалыахтара. 2026 сыллааҕы бүддьүөт бырайыагар бу маршруттары салгыырга наадалаах үп көрүллэр, онон бу хааччахтааһын быстах кэмнээх», — диир Владимир Сивцев.

Бу кэмҥэ Дьокуускай куораты уонна Жатай бөһүөлэгин ситимниир 209 уонна 211 №-дээх маршруттар урукку курдук үлэлииллэр. Миниистир бэлиэтээбитинэн, бу маршруттар өрөспүүбүлүкэтээҕи муниципальнай тэриллиилэр икки ардыларынааҕы  статуһу ылар, олохтоохтор сөбүлүүллэр.