Оренбургскай уобалас олохтоохторо айылҕа иэдээнигэр түбэстилэр

Хаар ууллуутун саҕана, муус устуутун кэмигэр нэһилиэнньэлээх пууннар олохтоохторугар  ыксаллаах быһыы-майгы үөскүүр. 

Бэҕэһээ Оренбургскай уобалас Орскай  куоратын олохтоохторо айылҕа иэдээнигэр түбэстилэр — олорор дьиэлэр, социальнай эбийиэктэр ууга бардылар.

«Даамба тоҕо баран, федеральнай таһымнаах ыксаллаах быһыы-майгы эрэсиимэ биллэрилиннэ. Бу маннык ыарахан түбэлтэҕэ биһиги туора туран  хаалбаппыт. «Биир ньыгыл Арассыыйа» баартыйаны өйөөччүлэр сэбиэттэрэ эрэгийиэннээҕи исполкому кытта Уопсастыбаннай өйөбүл ыстаабыгар гуманитарнай көмөнү хомуйууну көҕүлүүр. Уустук балаһынньаҕа түбэспит Оренбургскай уобалас олохтоохторугар көмөлөһөргө ыҥырабыт. Кыра уонна обургу оҕолор таҥастара, түргэнник буорту буолбат  ас-үөл, ону таһынан күннээҕигэ туттуллар табаар (товары первой необходимости) олус наадалар. Онон, күндү биир дойдулаахтарбыт, Дьокуускай куорат Курашов уулуссатын  24 нүөмэрдээх дьиэтигэр 405 кэбиниэккэ,  Уопсастыбаннай өйөбүл ыстаабыгар гуманитарнай көмөҕүтүн кэлэн туттараргытыгар ыҥырабыт», —  диэн «Биир ньыгыл Арассыыйа» баартыйаны өйөөччүлэр сэбиэттэрин эрэгийиэннээҕи салаатын салайааччыта, «Сахатранснефтегаз»  ААУо  генеральнай дириэктэрэ  Алексей Колодезников бэйэтин kolodeznikov_alexey t.me ханаалыгар ыҥырыы таһаарда.