«Орешник» ракета туһунан туох биллэрий?

РФ Бэрэсидьиэнэ Владимир Путин норуокка туһаайан этиитигэр бастакытын «Орешник» диэн саҥа комплекс туһунан иһитиннэрдэ. Кини этэринэн, бу улахан тыастаах бойобуой блоктаах орто ыраахха көтөр баллистическай ракета буолар. Түргэнэ — сөкүүндэҕэ 2-3 килэмиэтир. Бу туһунан РИА Новости саайт суруйар.

Ракета кэлэн түһэр хаартыскаларын көрдөххө, «Орешник» хас да чааска араарыллар эбит. Ортотунан 1000-5000 км ыраахха тиийэ көтөр. Маннык тиипкэ сэбиэскэй «Пионер» РСД-10, «Рубеж-26» киирсэллэр диэн суруйаллар. Бу «Рубеж» ракета 2027 сылга диэри госбырагыраамаҕа хапсыбатаҕа. Ону Днепропетровскайга кэлэн түһүү кэнниттэн Украина эспиэрдэрэ «Рубеж» ракета кэлэн түстэ диэн быһаарбыттар.

Интэриниэккэ тарҕаммыт видеонан көрдөххө уонна алтата кэлэн түһүүнэн сылыктаатахха, «Орешник» ракета алта блоктаах буолуон сөп. Кэлэн түһүү кэнниттэн тоҕута тэптэрии буолбата. Барыллаан, ракета кэлэн түһүүтэ бойобуой блоктарынан — болванкаларынан бэриллэр быһыылаах диэн саайт суруйар. Ракета дэлби тэптэриитэ да суох, кинетическэй күүһүн көмөтүнэн кэлэн түспүт сиригэр улахан хоромньуну оҥорор кыахтаах.