Оргуйбутунан итии эрэ уу ирдэнэр – ис миинэ бэлэм буола түһэр

Аҕыйах хонуктааҕыта Дьокуускайга буолан ааспыт ас-үөл өрөспүүбүлүкэтээҕи дьаарбаҥкатыгар оскуола ынах сүөһү буотараҕыттан тута буһар бакыаттаах миини оҥорон таһаарбыттарын туһунан сонун Саха сирин устун  тилийэ көттө. Ханнык оскуола үөрэнээччилэрэ саха сөбүлүүр аһын судургутук оҥоһуллар ньыматын тобуллулар?

Бу — Саха сиригэр киэҥник биллэр, тарбахха баттанар Чурапчы улууһун И.Е.Федосеев-Доосо аатынан Дириҥ агро оскуолатын үгүс бырайыактарыттан биирдэстэрэ. Оскуола биисинэс-инкубаторын салайааччыта Лена Луковцева бу курдук кэпсиир:

— Биһиги оскуолабыт өрөспүүбүлүкэтээҕи ас-үөл атыытын дьаарбаҥкатыгар сылын аайы ситиһиилээх кыттар. Агро-оскуола буоларбыт быһыытынан, бэйэбит кэтэх хаһаайыстыбалаахпыт: сүөһүлээхпит, сылгылаахпыт уонна оҕуруот аһын өлгөмнүк үүннэрэбит. Сайыҥҥы лааҕырга үөрэнээччилэр оҕуруот аһын көрөн-истэн үүннэрэн, күһүн үлэ быраактыкатын кэмигэр хомуйан, кэлэр сылга бэлэмнэнэллэр.

Оскуолабыт иһинэн 2016 сылтан биисинэс-инкубатор аһыллан үлэлиир. Манна үөрэнээччилэр араас бородууксуйалары, оҥоһуктары оҥорон атыыга таһаараллар.

Быйылгы ас-үөл дьаарбаҥкатыгар хортуоппуй, моркуоп, сүбүөкүлэ чипсыларын, аска кутуллар тумалары, хатарыллыбыт мииҥҥэ кутуллар “Сухой борщ”, пастилалары, араас хаппыыста салааттарын, сибиэһэй эти атыылаатыбыт. Саҥа бородууксуйабытынан түргэнник буһар ис миинэ буолар. Бу ис миинин оскуолабыт биисинэс-инкубаторыгар  үлэлиир профессиональнай үөрэхтээһин учууталлара уонна маастардара  идиэйэ киллэрэн, көҕүлээн оҥордулар. Бу туһунан өссө былырыын толкуйдаабыппыт, быйыл олоххо киллэрдибит. Оскуолабыт оҕолоро сылын аайы ис сууйуутугар, кырбааһыныгар толору үлэлэһэллэр.

35 кыраамнаах пакет састаабыгар ынах сүөһү буспут буотараҕа, хортуоска, лапса киирэр. Пакеттаах сухой састаапка 250 мл оргуйбутунан итии ууну кутан, булкуйан, 5 мүнүүтэ туруоран баран иһиллэр, — диэн кылгастык кэпсиир.

Быйылгы дьаарбаҥкаҕа сылдьан бу пакеттаах ис миинин атыылаһан амсайбыт дьон улаханнык сэҥээрбиттэрин этэллэр. “Бородууксуйабыт сэҥээрбиттэрин туһунан видео, санаа араас ситиминэн тарҕанан, билигин сакаастар киирэн эрэллэр. Салгыы маны кэҥэтэн, сайыннаран үлэлэһэр былааннаахпыт” – диэн салайааччы Лена Егоровна инники былааннарыттан сэгэтэн ааһар. Инникитин даҕаны Дириҥ агро-оскуолата дуо, дэтэн ааттата, сонун, барыстаах бырайыактары олоххо киллэрэ туруҥ.