Ороссолуодаҕа хортуоппуй хостууллар

Өрөспүүбүлүкэ улуустарыгар күһүҥҥү хомуур үлэтэ балаҕан ыйын бастакы күннэриттэн саҕаламмыта. Быйыл бары көрүҥнээх хаһаайыстыбаларга 71,8 тыһыынча туонна хортуоппуйу хомуйар соруктаахтар. Тэрээһиннээх хаһаайыстыбалар 19,9 тыһыынча туоннаны хомуйуохтара диэн СӨ Тыатын хаһаайыстыбатын уонна аска-үөлгэ бэлиитикэтин министиэристибэтэ сабаҕалыыр.

— Хортуоппуй хомуура Ороссолуодаҕа балаҕан ыйын 4 күнүттэн саҕаламмыта. Бүгүҥҥү күҥҥэ уопсайа хортуоппуй 84 гектар иэннээх сиртэн оронно. Баалабай  хомуур — 641 т. Былаанынан 570 гектартан 6874 туоннаны  хомуйуохпут диэн олоробут. Маны тэҥэ уопсайа 135 гектар сиргэ оҕуруот аһын олордубуппутун дьаһайыахтаахпыт. 12 гектартан 227 туоннаны хомуйдубут, ол иһигэр хаппыыста — 200 т,  моркуоп — 14 т уонна 13 т сүбүөкүлэ, — диэн иһитиннэрдэ Мэҥэ Хаҥалас улууһун тыа хаһаайыстыбатын управлениетын кылаабынай агронома Василий Бурнашев.