Орто анал үөрэх 85 сылын бэлиэтээтилэр

Бэҕэһээ Ю.А.Гагарин аатынан кииҥҥэ устудьуонтан бэтэрээҥҥэ, үлэ биэрээччигэ тиийэ дьон тоҕуоруһа муһунна – Арассыыйаҕа орто анал үөрэх систиэмэтэ тэриллибитэ 85 сылын бэлиэтээтилэр.

Муусука ньиргийдэ, микрофон холбонно. Ыытааччылар тэрээһин аһыллыбытын биллэрээттэрин кытта федеральнай куонкурустар кыайыылаахтара, миэстэлэспиттэрэ, уһуйааччылара, эспиэртэрэ “кыһыл дорожканан” хааман киирдилэр.

Тэрээһин аһыллыытын бэрт уратытык, аныгылыы креативнайдык толкуйдаабыттарын оннооҕор Судаарыстыбаннай Дуума дьокутаата Галина Данчикова бэлиэтээтэ. Саалаҕа — ытыс таһынар ыас хараҥа, арай сыанаҕа эрэ биирдиилээн уоттар умайан, салгыы сулус буолан устудьуон оҕолор үүнэн-сайдан, сандааран тахсалларын арыйаллар.

Галина Данчикова: “Дойдубутугар технологическай суверенитет сайдыыта инники күөҥҥэ турар кэмигэр, экэниэмикэҕэ үрдүк оробуочай каадыр ирдэнэринэн сибээстээн, орто анал үөрэх систиэмэтэ бу каадырдары иитэн таһаарыаҕа” — диэн эттэ. Итиэннэ Саха сирин орто үөрэхтэригэр 24 тыһ. кэриҥэ устудьуон үөрэнэрин, Арассыыйа экэниэмикэтин 24 салаатыгар исписэлиистэри бэлэмнииллэрин бэлиэтээтэ.

Бэлиэ күн Ил Дархан Айсен Николаев кыттыылаах, өрөспүүбүлүкэ 9 кэллиэһигэр, тиэхиньикумугар үөрүүлээх быһыыга-майгыга 20 аныгы мастарыскыайы уонна 1 фирменнэй кылааһы арыйдылар.

Үөрэх уонна билим миниистирэ Нюргуна Соколова тыл этэригэр Уһук Илини сайыннарар министиэристибэ өйөбүлүнэн, кэлиҥҥи сылларга 48 мастарыскыайы хаҥаттыбыт диэн бэлиэтээтэ. Федеральнай бырайыактары олоххо киллэрии былааннаахтык барарын, “Профессионалитет” бырайыак иитинэн номнуо 4 класстер оҥоһуллубутун, эһиил Дьокуускайдааҕы мэдиссиинэ кэллиэһэ инники күөҥҥэ турар технологиянан хааччыллыаҕын иһитиннэрдэ. Итиэннэ мастарыскыайдары арыйыы дьоро тэрээһинигэр, Уһук Илини сайыннарар министиэристибэ эһиил биһиги өрөспүүбүлүкэбититтэн өссө 10 мастарыскыайы талыаҕын туһунан эттэ.

“Биһиги иннибитигэр үөрэхтэрин бүтэрээччилэр 75% исписээлинэстэринэн үлэлиир үрдүк сорудаҕы туруораллар. Биирдиилээн кэллиэстэр бэйэлэрин холобурдарынан бу кыаллыан, профессионаллары иитэн таһаарыахха сөбүн көрдөрөллөр. Бары устудьуоннар, бүтэрээччилэр, өрөспүүбүлүкэ тэрилтэлэригэр кэлиҥ, идэҕитин баһылаабыт үрдүк сатабыллаах үлэһиттэринэн, дойду патриоттарынан буолуҥ” – диэн ыҥырда.

Үөрүүлээх тэрээһиҥҥэ орто анал үөрэҕи сайыннарыыга, ыччаты иитиигэ бэриниилээх, таһаарыылаах, үгүс сыллаах үлэлэрин иһин үлэһиттэргэ үрдүк наҕараадалары туттардылар.