“Орто дойду” туркомплекс аттыгар саҥа гостиница тутуллуоҕа

Саха сиригэр туризмы олоххо киллэриигэ сүүрбэттэн тахса сыл  үлэлэһэр Петр уонна Марианна Андреевтар урбаанньыт дьиэ кэргэннэрэ бу күннэргэ гостиница тутуутугар анаммыт бырайыактара федеральнай граҥҥа кыайан,  субсидия ыллылар.

Бу РФ Бэрэсидьиэнэ Владимир Путин көҕүлээбит “Туризм уонна ыалдьытымсах буолуу индустрията” национальнай бырайыак чэрчитинэн ыытыллар үлэ биир көрүҥэ.

“Орто дойду”  туркомплекс аттыгар 24 нүөмэрдээх гостиница тутулларын туһунан урбаанньыт, туркомплекс хаһаайына Петр Андреев санаатын бу курдук үллэһиннэ:

Хаҥалас улууһун «Орто Дойду» туристическай комплекс хаһаайына  бэлиэтииринэн, федеральнай граннарга урбаанньыт ыал икки төгүл кыттыбыттар. Бастакыга —  3 мөлүйүөн солкуобайдаах кыайбыт граннарыгар туристическай комплекс үс дьиэтин (коттедж) туппуттар.

Бу дьиэлэргэ билигин туристар олус сөбүлээн сынньаналлар. Иккис граннарын Андреевтар 2023 сыллаахха кыайбыттар.

— Саҥа инвестбырайыакпыт — аныгы  оҥоһуулаах, дизайннаах гостиницаны уопсастыбаннай мунньахтыыр, көрсүһэр зоналаах, сауналаах, бассейннаах 24 нүөмэрдээх гына туттар былааннаахпыт.

Биисинэс-былаан бырайыагынан 153 мөлүйүөн солкуобайдаах эбийиэк. Федеральнай грант үбүлээһинэ —  36 мөлүйүөн солкуобай, – диэн бэлиэтиир урбаанньыт Марианна Андреева.

Ити курдук, Дьиэ кэргэн сылыгар Андреевтар сонун сүүрээни олоххо киллэрэн, Саха сиригэр туризм сайдыытыгар дьоһуннаах кылааттарын киллиэриэхтэрэ.