Хаартыскаҕа Андрей Сорокин түһэриитэ, СИА.
Орто Халымаҕа балаҕан ыйын ортотун диэки эргиэн-логистика киинин үлэҕэ киллэриэхтэрэ.
Бу Арктика оройуоннарыгар алтыс киининэн буолар. Тутуу хаамыытын СӨ Ил Дархана Айсен Николаев оройуоҥҥа үлэтинэн тиийэ сылдьан көрдө, бэрэбиэркэлээтэ. Итиэннэ киини балаҕан ыйын ортотун диэки үлэҕэ киллэрэргэ соруйда.
«Бу тутуу үлэҕэ киирдэҕинэ, олохтоохтор сибиэһэй оҕуруот аһынан, фруктанан, онтон да атын наадалаах аһынан-үөлүнэн кыһыҥҥы суол-иис аһыллыар диэри харгыһа суох хааччыллыахтара этэ«, — диэн бэлиэтиир Айсен Николаев.
«Якутоптторг» АУо дириэктэрэ Николай Алексеев иһитиннэрбитинэн, Арктика оройуоннарыгар лууктан ураты барыта олохтоох ас-үөл аҕалыллыбыт. Тэрилтэ үһүс сылын олохтоох фермердэри кытары үлэлэһэр. Кинилэр үүнээйилэрин хаһан хомуйалларын, хоту улуустарга аһы-үөлү балаҕан ыйын ортотун диэки тиэрдиини учуоттаан үлэлииллэр. Итинэн Орто Халымаҕа эргиэн-логистика киинин тутан киллэрии, элбэх аһы-үөлү тиэрдэргэ, өр хаһаанарга көмөлөөх буолара чахчы диэн этиллэр.
Бу оройуоҥҥа дьаабылыка сыаната кэтээн, үөрэтэн көрүүнэн киилэтэ 400 солкуобайга тиийэр эбит буоллаҕына, тэрилтэҕэ таһаҕас тиэллиитинэн, хаһааныынан көрөн, киилэтэ 290 солк. тэҥнэһиэ диэн ааҕан-суоттаан көрөллөр. Билиҥҥи туругунан, «Якутоптторг» сыаната маннык: сымыыт 10 солк/уст., луук – 85 солк/кг, хортуоппуй 110 солк/кг, дьаабылыка киилэтэ 270 солкуобайтан саҕаланар.
Эргиэн-логистика кииннэригэр оҕуруот аһа, фрукта сүрүннээн күһүн тиэрдиллэр. Ас-үөл олунньуга, кыһыҥҥы суол-иис аһыллыар диэри анал хаһаанар сирдэргэ ууруллуо. Саппаас ас-үөл салгыы массыынанан тиэрдиллэн иһиэ. Онон нэһилиэнньэ ыам ыйыгар диэри наадалаах аһынан-үөлүнэн хааччыллыа диэн этиллэр. Онтон салгыы эрдэ ситэр оҕуруот аһын Владивостоктан ылан аҕалыахтара. Логистика маннык: Владивостоктан Магадааҥҥа диэри грузовой суудунанан аҕалаллар. Магадаантан Сеймчааҥҥа диэри рефрижератордарынан. Сеймчаантан Орто Халымаҕа диэри катердарынан. Бу салгын аалынан таһардааҕар 4-5 төгүл чэпчэки буолан тахсар.
Орто Халымаҕа эргиэн-логистика киинин уопсай иэнэ — 578 кв.м. Манна атыы-тутуу саалата, оҕуруот аһын хаһаанар сир, сылаас уонна тымныы ыскылааттар баар буолуохтара.
Тутуу суумата уопсайа 217 мөл.солк. «Якутоптторг» АУо хаачыстыбалаах тутуу матырыйаалларын атыылаһан аҕалар. Эргиэн-логистика киинин сирэ-уота аспаалланар, күрүөлэнэр-хаһааланар, уоттаах-күөстээх буолар.
Ил Дархан Айсен Николаев сорудаҕынан 2025 сыл бүтүөр диэри эргиэн-логистика кииннэрэ Арктика 13 оройуонугар баар буолуохтаахтар. Билиҥҥи туругунан 5 киин тутуллан үлэҕэ киирдэ. Бу Абый оройуонугар Белай Гораҕа, Усуйаанаҕа, Аллараа Халымаҕа Черскэй бөһүөлэгэр, Үөһээ Халымаҕа Зырянкаҕа, Анаабыр оройуонугар Сааскылаахха.
Сиһилии https://www.sakha.gov.ru/news/front/view/id/3367912 ааҕыҥ.
СӨ Ил Дарханын уонна Бырабыыталыстыбатын пресс-сулууспата
Бу күннэргэ Саха сирин улуустарыгар Төрөөбүт тыл уонна сурук-бичик күнүгэр анаммыт тэрээһиннэр салҕаналлар. Биир олус…
Бу үөрүүлээх күҥҥэ СӨ Бырабыыталыстыбатын Бэрэссэдээтэлэ Кирилл Бычков кыттыыны ылла. Гимназия устуоруйата 1990-с сыллар саҥаларыттан,…
Бэҕэһээ, Ийэ тыл, сурук-бичик күнүгэр, Киллэм култууратын дьиэтин үлэһиттэрэ ураты эҕэрдэлэринэн дьону соһуттулар уонна үөртүлэр.…
Бүгүн Уһук Илин тоҕус эрэгийиэнин сүүмэрдэммит хамаандаларын художественнай гимнастикаҕа бастыыр иһин күрэхтэһиилэрин үһүс күнэ Саха…
Төрөөбүт тыл уонна сурук-бичик күнүнэн Таатта улууһун Дьохсоҕон нэһилиэгэр “Саргыланнын-кынаттаннын сахам тылын кэрэтэ-кэрэмэһэ!” диэн өрөспүүбүлүкэ…
Бырабыыталыстыбаҕа Бүлүү бөлөх улуустарга уоту туһаныы кээмэйин диапазоннарын (тарыыптарын) хаттаан көрбүттэр. Сунтаар уонна Ньурба улуустарыгар…