Орто Халыма олохтооҕо икки киһини өлөрөн сууттаныаҕа

Орто Халыма олохтооҕо икки киһини өлөрөн сууттаныаҕа. Бу киһи өлүктэри өрүскэ тимирдибит диэн СӨ Силиэстийэлиир кэмитиэтэ иһитиннэрэр.

Биэдэмистибэ иһитиннэрэринэн, 48 саастаах эр киһи икки киһини өлөрбүтүнэн холуобунай дьыала силиэстийэтэ түмүктэммит. Быһылаан былырыын атырдьах ыйыгар Халыма өрүс кытылыгар буолбут.

Үс эр киһи аһыы утаҕы иһэ олорон этиспиттэр. Уорбаланааччы саанан икки киһини ытан түһэрбит. Онтон өлүктэри мотуордаах оҥочоҕо тиэйбит уонна оҥочо аннын алдьаппыт. Онон оҥочо өрүскэ тимирбит.

«Быһылаан тула элбэх дьайыы оҥоһулунна, силиэстийэ, суут-мэдиссиинискэй, химическэй, психиатрическай уо.д.а. эспэртиисэлэр ыытылыннылар. Дьыала суукка барда», — диэн СӨ СК иһитиннэрэр.