Андрей Сорокин (СИА) хаартыскаҕа түһэриитэ
Бу күннэргэ Орто Халыма оройуонугар «мобильнай дуоктардар» биригээдэлэрэ быйыл үһүс төгүлүн тиийэн үлэлии сылдьар. Кинилэри кытары бэҕэһээ Ил Дархан Айсен Николаев Орто Халыма оройуонугар үлэлиир кэмигэр көрүстэ.
Бу туһунан Ил Дархан пресс-сулууспата иһитиннэрэр.
«Мобильнай дуоктардар» бырайыагы биһиги Арктика улуустарыгар быйыл олунньу ыйтан саҕалаан үлэлэтэбит. Олунньу ыйтан муус устар бүтүөр диэри Өрөспүүбүлүкэтээҕи мобильнай биригээдэ киинин быраастара 13 Арктика улууһун 89 нэһилиэгэр сылдьан олохтоохтор доруобуйаларын көрдүлэр, чинчийдилэр. Сайын эмчиттэр бу оройуоннарга иккиһин сырыттылар, оттон Орто Халымаҕа үсүһүн кэллилэр. Бырайыак саҕаланыаҕыттан барыта 200 тыһыынчаттан тахса киһини көрдүлэр, ол иһигэр 6 тыһыынча оҕону. Бу бырайыак Саха сирин олохтоохторугар олус наадалаах, онон салгыахпыт», – диэтэ Айсен Николаев.
Орто Халыма оройуонугар бу сырыыга терапевт, кардиолог, травматолог-ортопед, акушер-гинеколог, ультразвуковой диагностика бырааһа, офтальмолог, невролог, пульмонолог, ортопед, отоларинголог уонна педиатр, ону таһынан лаборант уонна статист үлэлииллэр. Кулун тутар ыйга быраастар кытыы сытар уустук суоллаах-иистээх нэһилиэктэргэ «Буранынан» сылдьыбыт буоллахтарына, сайыҥҥы өттүгэр Ми-8 бөртөлүөтүнэн тиийэллэр. Быраастар атырдьах ыйын саҥатыттан 1144 киһини көрдүлэр, онтон 388-һа – оҕо.
«Арктика улуустарыгар мобильнай биригээдэ быраастарын үһүс кэлиилэрэ. Аан бастаан биһиги быраастарбыт Орто Халымаҕа кулун тутарга үлэлээбиттэрэ, 1600 улуус олохтооҕун көрбүттэрэ, оттон ыам ыйын бүтүүтэ, бэс ыйын саҥата анал педиатрическай биригээдэ кэлэн үлэлээбитэ. Кинилэр оҕолору эрэ көрбүттэрэ. Атырдьах ыйыгар үһүс биригээдэ кэлэн үлэлии сылдьар», – диэтэ Өрөспүүбүлүкэтээҕи уопсастыбаннай доруобуйа уонна мэдиссиинэ профилактикатын киинин кылаабынай бырааһа Алена Никитина.
Орто Халыма киин балыыһатын кылаабынай бырааһын эбээһинэһин толорооччу Анна Григорьева бэлиэтээбитинэн, «мобильнай дуоктардар» Орто Халыма бары нэһилиэктэригэр сылдьан үлэлииллэр. Учуокка ылыллыбыт ыарыһахтар салгыы Дьокуускай куораттан телемэдиссиинэ көмөтүнэн эмтэниэхтэрэ, суһал көмөҕө наадыйааччылары киин куоракка ыытыахтара.
Саҥа үөрэх дьылыттан үрдүк үөрэх кыһаларыгар истипиэндьийэ 7,6 бырыһыантан итэҕэһэ суох үрдүөҕэ. Бу бүддьүөт миэстэтигэр…
Бүгүн, атырдьах ыйын 31 күнүгэр, Орджоникидзе болуоссакка фонтан хапытаалынай өрөмүөнүн кэнниттэн үлэтэ түмүктэннэ. Бэдэрээтчит фонтаны…
Истэрин истэр этим, ааҕарын ааҕар этим да, эмэн сааспар көрбөтөхпүн көрөммүн бэри диэн бэккиһээн, сөрү…
Күн 4197 нүөмэрдээх куттааллах чааһа Сир диэки хайыста, диэн РНА Космос чинчийиилэрин институтун (КЧИ) Күн…
Хотугулуу-Илиҥҥи федеральнай университет байыаннай дьайыы кыттыылаахтарын туһунан «Эһиги биһиги өйбүтүгэр-санаабытыгар хаалаҥҥыт, мэлдьи тыыннаах буолуоххут» диэн…
Бу күннэргэ «Дьокуускайдааҕы үүт собуота» ХЭТ сыыр сыаҕар саҥа сезона үөрүүлээхтик аһылынна. Сыах 1996 сылтан…