Орто Халыма оройуонугар ыксаллаах быһыы-майгы эрэсиимэ биллэрилиннэ

Орто Халымаҕа Халыма өрүскэ уу таһыма кутталлаах кирбиини ааспыт. Кэнники иһитинэриинэн, 1272 см тиийбит, кутталлаах кирбии — 1200. Уу эбиллиэн сөп.

СӨ Бырабыыталыстыбатын бэрэссэдээтэлэ Кирилл Бычков сорудаҕынан, миэстэтигэр тиийэн үлэни бастакы вице-премьер Дмитрий Садовников сүрүннүө.

Билигин иһитиннэриллибитинэн 12 тиэргэн ууга барбыт уонна олохтоох суолталаах аҕыс суолу сорох сиринэн уу ылбыт.

1 №-дээх суһал бөлөх уонна мууһу дэлби тэптэрээччилэр бөлөхтөрө РФ МЧС Ми-8 бөртөлүөтүнэн үлэлииллэр. Орто Халыма куоратыттан 15 км аллараа Луобуйа сиригэр муус харыыта тахсыбыта бэлиэтэнэр. Маны мууһу дэлби тэптэрэн туоратар былааннаахтар.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!

СӨ Ил Дарханын уонна Бырабыыталыстыбатын пресс-сулууспата