Орто Халыма улууһугар «мобильнай доктор» икки биригээдэтэ үлэлиир

Бу күннэргэ Орто Халыма улууһугар «мобильнай доктор» икки биригээдэтэ үлэлии сылдьар. Быраастар олохтоохтору көрөн эмп анаатылар, сорохтору салгыы көрөргө уонна Дьокуускайтан быһа сибээһинэн эмтииргэ учуокка ыллылар.

Биригээдэ олунньу 2 күнүгэр тиийбитэ уонна номнуо түөрт нэһилиэк олохтоохторун көрдө. Хатыҥнаах нэһилиэгэр 90, Сыбаатайга 188, Эбээххэ 130, Өлөөкө Күөлгэ 174 киһини көрдүлэр. Быраастар бүгүн Березовка сэлиэнньэтигэр көтүөхтэрэ.

Биригээдэ бастакы бөлөҕүн терапевт быраас Саргылаана Сыромятникова салайар. Ол иһигэр терапевт, кардиолог, невролог, офтальмолог, ультразвуковой диагностика бырааһа, акушер-гинеколог, травматолог уонна эндокринолог бааллар. Быраастар дьон доруобуйатын чинчийэллэригэр электрокардиограмма, холтеровскай кэтээн көрүү, мобильнай УЗИ-аппаратын илдьэ сылдьаллар.

Иккис биригээдэ олунньу 9 күнүгэр тиийбитэ, Ойуһардаах сэлиэнньэтигэр үлэлиир. Ыраах, уустук суоллаах-иистээх Сылгы Ыытар сэлиэнньэтигэр быраастар 156 киһини көрдүлэр.

Орто Халыма улууһун дьоно-сэргэтэ маннык пилотнай бырайыагы тэрийэн, ыраах сытар нэһилиэктэргэ мэдиссиинэ көмөтүн оҥорбуттарын иһин махталларын биллэрдилэр.
«Орто Халымаҕа анал идэлээх исписэлиистэр суохтар. Быраастар Дьокуускайтан мэдиссиинэ оборудованиетын аҕалбыттар, электрокардиограмма, УЗИ оҥороллор. Элбэх киһи онкомаркер аналиһын туттарда», – диэн «Халыма долгуннара» хаһыат олохтоохтор санааларын тириэрдэр.

Бу пилотнай бырайыак Ил Дархан Айсен Николаев көҕүлээһининэн олунньу ыйтан саҕаламмыта.

Бастакы мобильнай биригээдэлэр Арктика түөрт оройуонун – Абыйы, Аллара Халыманы, Орто Халыманы уонна Усуйаананы хабар. Муус устар ый бүтүөр диэри Арктика орйуонун бары нэһилиэнньэлээх пууннарыгар сылдьыахтара, ол ыраах сытар, суола-ииһэ суох 80-н тахса сэлиэнньэ буолар.

СӨ Ил Дарханын уонна Бырабыыталыстыбатын пресс-киинэ.