Орто Халымаҕа аэропорт уонна тэлгэһэлэр халаан уутуттан босхолоннулар

Орто Халыма куорат таһыгар уу таһыма 1029 см диэри түстэ. Дьиэлэр тэлгэһэлэрэ уонна аэропортка көтөр-түһэр балаһа халаан уутуттан босхолонно.

Бу туһунан СӨ Гражданскай оборуона уонна нэһилиэнньэ олоҕор-дьаһаҕар куттал суох буолуутун хааччыйыыга миниистирин бастакы солбуйааччы Айаал Вензель иһитиннэрдэ.

Халыма оройуонун Колымское сэлиэнньэ аттыгар муус хамсааһына бэлиэтэнэр, уу таһыма 763 тиийдэ.
Билиҥҥитэ муус Өлүөнэ өрүскэ Эдьигээн оройуонун территориятынан ааһар.

Муус үөһээ тардыыта Эдьигээн сэлиэнньэтиттэн үөһэ бэлиэтэнэр. Алын тардыыта Джарджан гидропостан аллараа — муус хойуутук устар.

Дьааҥы өрүскэ муус Үөһээ Дьааҥы уонна Усуйаана оройуоннарын территориятынан устар.