Орто Халымаҕа биэс сыл устатыгар хаарбах дьиэттэн дьону көһөрүү үлэтэ 

Орто Халыма улууһугар биэс сыл устатыгар 10 тыһ. кв.м. иэннээх саахалланар туруктаах дьиэттэн 470 киһи көһөрүллүбүт.  Бу туһунан Бырабыыталыстыба отчуотугар СӨ тутууга миниистирэ  Виктор Романов эттэ.

«2019-2024 сс. хаарбах туруктаах дьиэттэн дьону көһөрүү бырагырааматынан барыта 470 киһи көһөрүлүннэ. Бу Арктикаҕа бастыҥ көрдөрүү«, — диэтэ миниистир.

Кини маны таһынан быйыл улууска өссө икки элбэх кыбартыыралаах дьиэни үлэҕэ киллэрэр былаан баарын иһитиннэрдэ. Орто Халымаҕа Петранкиннар уулуссаларыгар тутуллар дьиэлэр атырдьах ыйын саҥатыгар диэри үлэҕэ киллэриллиэхтээхтэр.

«Олорор дьиэ уонна куорат эйгэтэ национальнай бырайыак иитинэн, «2019-2025 сс. хаарбах туруктаах дьиэттэн дьону көһөрүү» өрөспүүбүлүкэтээҕи аадырыстаах бырагырааманан өрөспүүбүлүкэҕэ 888,99 тыһ.кв.м. иэннээх хаарбах туруктаах дьиэттэн 46,89 тыһ.киһи көһөрүллүбүт. 2025 сыл бүтүөр диэри өссө 48 тыһ. тахса киһини көһөрөр былааннаахтар.

Санатан эттэххэ, СӨ Бырабыыталыстыбатын отчуота олунньу 3 күнүттэн саҕаламмыта уонна кулун тутарга диэри ыытыллар. Түмүктэр «Саха» НКИХ тахсаллар. Кыраапыгы сиһилии бу сигэнэн киирэн көрүөххүтүн сөп: https://www.sakha.gov.ru/news/front/view/id/3480409

СӨ Ил Дарханын уонна Бырабыыталыстыбатын пресс-сулууспата