Орто Халымаҕа икки улахан ойуур баһаара хонтуруолга ылыллыбыт

Бүгүҥҥү күн туругунан, Халыматааҕы ойуур хаһаайыстыбата иһитиннэрэринэн, Орто Халыма улууһун сиригэр-уотугар 2 улахан ойуур баһаара баара биллэр.

Ойуур баһаара, үөһээттэн кэтээн көрүү көрдөрөрүнэн, Орто Халыма куоратыттан өрүс уҥуор 35 биэрэстэ тэйиччи барар.

Орто Халыма улууһун баһылыга Иван Лаптев этэринэн, от ыйын 17 күнүгэр Вяткино учаастакка ойуур уота дьон олорор сиригэр чугаһаабытынан сибээстээн улууска Суһал ыстаап тэриллибит. Суһал хомуур күүһүнэн, 21 киһи (Орто Халыма улууһун дьаһалтатыттан, СӨ САУо «Якутлесресурс», Халыматааҕы быыһыыр-көрдүүр этэрээт, Орто Халыматааҕы баһаар утары баҕа өттүнэн үлэлиир этэрээт) баһаар миэстэтигэр уоту утары киирсэ тиийбиттэр.

Санатан эттэххэ, от ыйын 14 күнүттэн Орто Халымаҕа ойуур баһаарыттан улуус таһымнаах ыксаллаах быһыы-майгы эрэсиимэ биллэриллибитэ.