Орто Халымаҕа мууһу дэлби тэптэрэр үлэлэри ыытыахтара

Орто Халымаҕа мууһу дэлби тэптэрэр үлэлэри ыытар туһунан быһаарыы ылыллыбыт.

Бу үлэни Саха сирин быыһыыр сулууспатын начаалынньыга Иннокентий Андросов салайыаҕа.

«Балаһыанньа хонтуруолга тутуллар. Лобуйа диэн сиргэ муус харбыт, ону дэлби тэптэриинэн туоратарга быһаарынныбыт «, — диэтэ Иннокентий Андросов.

Эргийэн көтүүнү, көрүүнү МИ-8 бөртөлүөт оҥордо. Орто Халыма оройуонун көрдүүр-быыһыыр этэрээтин үлэһиттэрэ «Удача Плюс» дэлби тэптэрээччилэрин кытта оҥоруохтара.

Миэстэтигэр билигин суһал бөлөх үлэлиир. Бүгүн күнүскү иһитиннэриинэн Орто Халыма куоратыгар уу таһыма 1157 см үрдээбит.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!