Орто Халымаҕа мууһу эһиннэрэр үлэ салҕанар

Халыма өрүскэ муус Орто Халыма куорат аттынан ааһар, мууһу эһиннэрэр үлэлэр салҕаналлар. Уу таһыма 1241 см. тэҥнэһэр, кутталлаах таһым 1200 см буолар. Бу туһунан СӨ гражданскай оборуона дьыалаларын уонна нэһилиэнньэ олоҕор-дьаһаҕар куттал суох буолуутун хааччыйар миниистир бастакы солбуйааччыта Айаал Вензель иһитиннэрэр.

Кини этэринэн, муус үөһэҥҥи кирбиитэ Орто Халыма нэһилиэнньэлээх пуунуттан 30 км үөһэ баар. Алларааҥҥы кирбиитэ нэһилиэнньэлээх пуунтан 6-10 км аллара бэлиэтэнэр.

“Бүгүн Дьокуускай бириэмэтинэн сарсыарда 8:15 мүн. эһиннэрэр үлэлэр салҕаналлар. Туруоруллубут сорудахтар уонна кыһалҕалаах боппуруостар суһаллык быһаарыллаллар” – диэн Вензель этэр.

Өлүөнэ өрүскэ муус Кэбээйи уонна Эдьигээн улуустарынан ааһар. Муус үөһээҥҥи кирбиитэ Сангар бөһүөлэгиттэн аллара бэлиэтэнэр – сэдэхтик устар. Алларааҥҥыта – Эдьигээн бөһүөлэгин аллара, хойуутук устар.

Дьааҥы өрүскэ муус Дьааҥы улууһугар тиийдэ. Алларааҥҥы кирбии Сайдыы сэлиэнньэтиттэн  70 км аллара бэлиэтэнэр, муус сэдэх. Үөһээҥҥи кирбиитэ – Баатаҕай бөһүөлэктэн 60 км аллара, муус сэдэх.

Индигир өрүскэ муус Муома уонна Өймөкөөн улуустарынан барар. Үөһээҥҥи кирбии – Уус Ньара бөһүөлэктэн 10 км аллара, мууһа аҕыйах. Алларааҥҥы кирбии – Хонуу сэлиэнньэтиттэн аллара, муус аҕыйах. Өлөөн өрүскэ муус хойуу.

Бу туһунан Ил Дархан уонна Бырабыыталыстыба пресс-сулууспата иһитиннэрэр.