Орто Халымаҕа оҕолордоох массыына сүппүтүн туһунан иһитиннэрбиттэр

Бүгүн, тохсунньу 5 күнүгэр, Орто Халыма улууһугар оҕолор олорсон испит массыыналара сүппүтүн туһунан СӨ Быыһыыр сулууспатыгар иһитиннэрбиттэр.

Быһаарыллыбытынан, субуотаҕа, тохсунньу 4 күнүгэр, киэһэ хойут Өлөөкө Күөл сэлиэнньэтиттэн Орто Халыма куоракка «Сузуки Эскудо» массыына айаҥҥа туруммут. Бу хайысханан алта чаас кэриҥэ айанныыллар, ол эрээри 9 ч. массыына ыйыллыбыт сиргэ кэлбэтэх.

Пассажирдар истэригэр 13 уонна 14 саастаах оҕолор бааллар эбит. Кинилэри кытта икки улахан киһи.

Кэлин быһаарыллыбытынан, айанньыттар массыыналара куоракка 60 км чугаһаан баран алдьаммыт. Ол эрээри, хата, кинилэргэ бу хайысханан айаннаан испит КамАЗ түбэспит.  Кинилэри быыһыы 9:40 чааска икки быыһааччы туруммут диэн СӨ Быыһыыр сулууспатын пресс-сулууспата иһитиннэрэр.