Орто Халымаҕа сүппүт эр киһини көрдөөһүн салҕанар

Орто Халымаҕа сүппүт эр киһини көрдөөһүн салҕанар диэн СӨ Быыһыыр сулууспата иһитиннэрэр.

Ахсынньы 26 күнүгэр Орто Халыма куорат олохтоох дьахтара 69 саастаах кэргэнэ ахсынньы 13 күнүттэн биллибэккэ сүппүтүн туһунан тыллаабыт. Кини этэринэн, эр киһи Орто Халыма куораттан 15 км тэйиччи «Сайылык» диэн сиргэ тахсыбыт.

Бэҕэһээ, ахсынньы 27 күнүгэр, Халыматааҕы көрдүүр-быыһыыр этэрээт икки быыһааччыта, полиция үлэһитэ уонна дьахтар икки «Буран» снегоходунан көрдүү таҕыспыттара. Кэлин биллибитинэн, эр киһи өссө сэтинньи ый бүтүүтэ — ахсынньы саҥатыгар сүппүтэ быһаарылынна. Ол күн сүтүктээх дьахтар уһуктан баран, сарсыарда кэргэнин булбатах. Хаарга суолун батыһыннаран көрдүү барбыт. 10- ча километры ааһан баран, кэргэнин булбут уонна дьиэтигэр төнүннэрэ сатаабыт да кыаллыбатах. Дьахтар тоҥон дьиэтигэр төннүбүт, оттон эр киһи күөл кытылыгар хаалбыт. Ол кэннэ дьахтар үс төгүл эр киһини көрдүү сатаабыт да булбатах. Киһи сүппүтүн туһунан ахсынньы 26 күнүгэр  биирдэ тыллаабыт.

— Эр киһи сүтүөҕүттэн элбэх хаар, тибии түһэн суола көстүбэт, — диэн Халыматааҕы көрдүүр-быыһыыр этэрээт начаалынньыга Алексей Тарасов иһитиннэрэр. – Ону таһынан күн-дьыл кылгас буолан уустуктары үөскэтэр. Бүгүн, ахсынньы 28 күнүгэр, көрдүүр үлэлэр салҕаныахтара.