Орто Халымаҕа сүппүт ыал этэҥҥэ дьиэтин булла

Бүгүн, тохсунньу 5 күнүгэр, СӨ Быыһыыр сулууспата Орто Халымаҕа массыынанан айаннаан иһэр оҕолоох дьон сүппүттэрин туһунан иһитиннэрбитин туһунан суруйбуппут. Тохсунньу 4 күнүгэр киэһэ «Сузуки Эскудо» массыынанан икки оҕолоох ыал Өлөөкө Күөл сэлиэнньэтиттэн Орто Халыма куоракка айаннаабыттар.

Халыматааҕы быыһыыр-көрдүүр этэрээт быыһааччылара көрдүүр үлэни саҕалаабыттара. Бүгүн 9:40 чааска бу хайысханан айаннаабыт КамАЗ суоппара эрийэн, Орто Халыматтан 60 км тэйиччи сиргэ массыыналаах дьон генератордара алдьаммытын туһунан иһитиннэрбит.

Быыһааччылар массыыналаах дьону булан, собуоттуурга көмөлөспүттэр. Мэдиссиинискэй көмөттөн аккаастаммыттар. Ыал этэҥҥэ Орто Халыма куоракка тиийбитин туһунан СӨ Быыһыыр сулууспатын пресс-сулууспата иһитиннэрэр.