Орто Сурт аттыгар пассажирдаах массыына түҥнэстибит

Горнай оройуонун Орто Сурт сэлиэнньэтиттэн 15 км тэйиччи сиргэ түөрт пассажирдаах массыына суолтан туораан түҥнэстибит.

Эмсэҕэлээбиттэри Үөһээ Бүлүү оройуонугар командировкаҕа айаннаан испит 2- с №-дээх өрөспүүбүлүкэтээҕи балыыһа мобильнай хирургтара эвакуациялыырга көмөлөстүлэр.

Биир эмсэҕэлээбит дьахтарга быраастар төбөтүн бааһырдыбытын тикпиттэр диэн СИА-ҕа быраас- нейрохирург Максим Макиевскай иһитиннэрдэ.

Миэдиктэр миэстэтигэр эмсэҕэлээбит  дьону көрдүлэр. Онтон Орто Сурт сэлиэнньэтин  амбулаториятыгар көмө оҥорбуттар. Биир эмсэҕэлээччини дьахтары араас эчэйиини ылбытынан Горнайдааҕы киин балыыһаҕа илдьиэхтэрэ. Кини сыҥааҕын үөһэ уҥуоҕун тоһуппута уорбаланар.

«Массыынаҕа түөрт дьахтар уонна биир суоппар бааллар этэ. Үс дьахтар туруктара үчүгэй, биир дьахтары врачебнай амбулатория баазатыгар төбөтүн бааһын тиктилэр. Биһиги кинилэри Бүлүүтээҕи киин балыыһаҕа илдьибиппит. Массыына суоппара эмсэҕэлээбэтэх», — диэн быраас-нейрохирург  Максим Макиевскай иһитиннэрдэ.

Мобильнай хирургтар биригээдэтэ билигин Үөһээ Бүлүүгэ айанныыр.  Көһө сылдьар биригээдэ бөлөҕөр 2 №-дээх балыыһа исписэлиистэрэ бааллар — хирург, оториноларинголог, сосудистай хирург, травматолог-ортопед уонна анестезиолог-реаниматолог.