Орто Сурт олохтоохторо саҥа кулуубу туруорсаллар

Горнай улууһугар СӨ Бырабыыталыстыбатын отчуота салҕанар.

Олунньу 3 күнүгэр култуура миниистирэ Афанасий Ноев салайааччылаах бөлөх Орто Сурт сэлиэнньэтигэр отчуоттаата.

Маҥаны нэһилиэгэр 550 киһи олорор. 2017 сыллаахха тутуллубут оскуолаҕа 98 оҕо үөрэнэр. Хаарбах дьиэлэри көһөрүү бырагырааматынан 4 кыбартыыралаах таас дьиэ тутуллан киирдэ.

Олохтоохтор хаарбах туруктаах кулууп оннугар саҥа дьиэни тутары туруорсаллар. Нэһилиэк баһылыга Михаил Текеянов этэринэн, сэлиэнньэ 90%-на киин ититии ситимигэр холбонон олорор. Илин Толооҥҥо уонна Чараҥ түөлбэтигэр уончалыы ыал олорор, кинилэргэ ититии ситимэ тиийэр кыаҕа суох. Онуоха атын ньыманан холбонуу суолун көрдүүллэр.

Биллэрин курдук, сэлиэнньэ ортотунан федеральнай суол ааһар. Баһылык этэринэн, сэлиэнньэҕэ суол аспаалланыан наада — сырыы-айан элбэх буолан, быыллаах, тыастаах, оҕолор да сылдьалларыгар кутталлаах. Онон аспааллааһыны, лаампанан сырдатыыны, хаартыска, видео камераларын туруорсаллар.

Маны тэҥэ, эмиэ Кэптиҥҥэ курдук, олохтоохтор интэриниэт ситимэ Бүлүүттэн эрэ кэлбэккэ, Дьокуускайга тиийэ, төгүрүччү буоларын баҕараллар. Тоҕо диэтэр, саас, күһүн Бүлүү диэки уот элбэхтик барар, ол аайы сибээс сүтэн иһэр.

Баһаар кэмигэр Бордуолаах мелиоративнай ситимин даамбата алдьанан, ходуһалары ньүөлсүппэт буолан, кыһалҕалары үөскэттэ.