Орто үөрэх улахан аҥаара Доҕордоһуу болуоссатыгар муһунна

Бэҕэһээ Дьокуускай куорат киинигэр – Доҕордоһуу болуоссатыгар орто үөрэх тэрилтэлэригэр докумуону туттарыы биир кэлим күнэ буолан ааста.

Үөрэх уонна билим миниистирин бастакы солбуйааччы Михаил Присяжнай: “Кэлин орто үөрэх материальнай баазата биллэ тубуста, аныгы мастарыскыайдар тэрилиннилэр. Уһун кэм устата үлэлээбит үөрэх кыһаларын сэргэ, соторутааҕыта тэриллибит кыһалар, саҥа аһыллыбыт исписээлинэстэр бааллар. Үөрэх тэрилтэлэригэр манна миэстэтигэр докумуону туттарар табыгастаах” – диэн тэрээһин аһыллыытыгар эттэ. Быйыл 6 тыһ. тахса бүддьүөт миэстэтэ көрүллүбүт. Бу улахан аҥаара 9-с кылаас кэнниттэн туттарсааччыларга аналлаах диэн кини бэлиэтээтэ.

Людмила Миронова, Хаандыгатааҕы горнай-геологическай тиэхиньикум дириэктэрин үөрэх-иитии чааһыгар солбуйааччыта:

— Быйыл биһиги оҕолору биэс хайысханан үөрэххэ ылабыт: 9-с кылаас кэнниттэн (мастер по ремонту и обслуживанию автомобилей; геологическая съемка, поиски и разведка месторождений полезных ископаемых) уонна 11-с кылаас кэнниттэн (маркшейдерское дело; техника и разведка месторождений полезных ископаемых; обогатитель полезных ископаемых).

Быйыл аан маҥнайгытын Горнай-геологическай тиэхиньикум үөрэххэ туттарсааччыларга анаан Айфон-16 оонньотор. Кыайыылаах балаҕан ыйын 27 күнүгэр – 1 куурустар сүрэхтэниилэрин күнүгэр биллиэҕэ. Манна аттестаты бэйэтин (оригинал) туттарбыт ханнык баҕарар абитуриент кыттыан сөп. Тиэхиньикум тэриллибитэ эһиил 15 сыла буолар, эдэр үөрэх кыһата. Ол эрээри, бырамыысыланнас хайысхатыгар номнуо тыһыынчаттан тахса исписэлииһи үөрэтэн таһаардыбыт. Онон оонньуу тиэхиньикуммутун киэҥ араҥаҕа иһитиннэрэр, биллэрэр сыаллаах ыытыллар. Элбэх биллэр-көстөр бырамыысыланнай тэрилтэлэри кытта ыкса ситимнээхтик үлэлэһэбит. Бүтэрбит оҕолорбут идэлэринэн хааччыллыылара сыллата 70-ча бырыһыаҥҥа тэҥнэһэр, — диэн этэр. Улуус тас өттүттэн кэлээччилэр булгуччу уопсайынан хааччыллаллар диэн бэлиэтиир.

Ити курдук бэҕэһээ болуоссакка тиийбит оҕолор, төрөппүттэр өрөспүүбүлүкэ орто үөрэҕин тэрилтэлэрин бэрэстэбиитэллэрин кытта илэ кэпсэтэр, ыйытыыларыгар толору хоруйдары ылар кыахтаннылар.

Жанна, Усуйаана улууһун олохтооҕо:

— 9-с кылааһы бүтэрдим. Намнааҕы педагогическай кэллиэскэ туттарсыахпын баҕарабын. Биир дойдулаахтарым үөрэнэллэр, үчүгэй дииллэр. Бэйэм миэстэтигэр тиийэн көрбөтөҕүм.

Бу маннык тэрээһини куоракка ыыталлара үчүгэй. Улууска туттарсар оҕолорго олус табыгастаах. Докумуон туттарыам этэ диэн анаан-минээн барар эмиэ ороскуот буолар.

Рома, Таатта улууһун олохтооҕо:

— Докумуоммун эрдэ Автодорожнай тиэхиньикумҥа ыыппытым. Үөрэххэ туттарсааччыларга тэрээһин буоларын истэн анаан-минээн кэлбитим. Үөрэх тэрилтэтэ, идэ олус элбэх эбит. Бэйэм тиэхиньикэ өттүн сэҥээрэр буолан, ол хайысхалары көрөттүүбүн. Атын үөрэх тэрилтэлэригэр эмиэ сайабылыанньабын биэрэр санаалаахпын, — диир.

Быйылгы тутар хамыыһыйа единэй киинэ Крупская уулусса 13-с нүөмэрдээх дьиэтигэр баар. Онон улуустааҕы орто үөрэхтэргэ туттарсыан баҕалаахтар  атырдьах ыйын ортотугар диэри сайабылыанньаларын биэриэхтэрин сөп.