Осакатааҕы ЭКСПО-ҕа сахалыы сүктэр кыыс киэргэлин көрдөрүөхтэрэ

Япония Осака куоратыгар ЭКСПО Аан дойдутааҕы быыстапката түмүктэнэн эрэр.

Алта ый устата 158 дойду ситиһиитин көрдөрбүт сүҥкэн түһүлгэҕэ 28 мөлүйүөн кэриҥэ киһи сырытта. Быыстапка сүрүн соруга – киһи-аймах сайдыытыгар саҥа технология уонна уопсастыба оруолун көрдөрүү. Бу тэрээһин чэрчитинэн ыытыллар Аан дойдутааҕы пуорумҥа Саха сириттэн 10 киһилээх бөлөх сахалыы сүктэр кыыс киэргэлин  көрдөрүөҕэ.

Бөлөх салайааччыта, «Симэх» норуот ускуустубатын уонна уус-уран оҥоһуктарын национальнай киинин дириэктэрэ Яна Игнатьева. Кини сиэр-туом туһунан пуорум кыттыылаахтарыгар кэпсиэҕэ. Саха сирин бөлөҕө бу тэрээһиҥҥэ «Евразия дьахталларын» альянсын өйөбүлүнэн, Казахстаан дэлэгээссийэтин састаабыгар киирэн кыттар.

Альбина Тарабукина