Бастакы кылааска быйыл биэс сүүс кэриҥэ байыас оҕото киирдэ

Байыаннай дьайыы кыттыылаахтарын оҕолоругар өйөбүлү оҥоруу Саха Өрөспүүбүлүкэтин үөрэҕин уонна билимин министиэристибэтин үлэтин биир сүрүн хайысхатынан буолар.

Быйыл  саҥа үөрэх дьылыгар байыаннай дьайыы кыттыылаахтарын дьиэ кэргэттэриттэн 484  оҕо оскуола боруогун аан маҥнай атыллаата. Итинтэн 266 оҕо Дьокуускай оскуолаларыгар үөрэниэ.

— Биһиги байыаннай дьайыы кыттыылаахтарын оҕолоругар ураты болҕомтобутун уурабыт. Оҕолор табыгастаах усулуобуйаҕа үөрэниэхтээхтэр уонна хаачыстыбалаах үөрэҕи ылыахтаахтар, дьиэ кэргэттэрэ судаарыстыба, уопсастыба болҕомтотун уурарын билиэхтээхтэр, — диэн этэр СӨ үөрэҕин уонна билимин миниистирэ Нюргуна Соколова.

Үөрэх уонна билим министиэристибэтэ байыаннай дьайыы кыттыылаахтарын дьиэ кэргэттэрин арыаллыыр, ол иһигэр оҕолору үөрэх тэрилтэлэригэр миэстэлэринэн хааччыйыы, психолого-педагогическай көмөнү оҥоруу, култуурунай уонна иитэр-үөрэтэр бырайыактарга кыттыы кэлим үлэлэрин салгыыр.

СӨ Ил Дарханын уонна Бырабыыталыстыбатын пресс-сулууспата