Оскуола дириэктэригэр саба түспүт ийэни хаайдылар

Булуҥ улууһун суута оскуола дириэктэрин кырбааһыҥҥа буруйданан, Эдьигээн улууһун олохтооҕун дьыалатыгар административнай быраабы кэһии туһунан быһаарыы таһаарда.

Быһылаан былырыын ахсынньыга буолбут. Оччолорго биир үөрэнээччи ийэтэ итирик туруктаах оскуола дириэктэрин хоһугар киирбит. Суут дааннайынан, төрөппүт үөрэх кыһатын салайааччытын сөбүлээбэтиттэн, этин-сиинин эчэппит. Кини дириэктэри икки илиитинэн санныга охсубут, онтон илиилэриттэн харбаан ылан хам туппут, тыҥыраҕынан хайыта тарпыт уонна сутуругунан санныга иккитэ охсубут.

Суут мунньаҕын кэмигэр дьахтар буруйун билиммит уонна кэмсинэрин эппит. Ол да буоллар, кини салгыы дириэктэргэ куттаабыт уонна үөхпүт. Ол түмүгэр суут бириистэбэ РФ Административнай кодексатын 17.3 ыстатыйатынан (суут үлэтин бэрээдэгин кэһии) өссө биир боротокуолу оҥорбут. Суутунан дьахтар 10 сууккаҕа хаайылынна. Суут быһаарыыта сокуоннай күүһүгэр киирэ илик диэн СӨ Сууттарын холбоһуктаах пресс-сулууспата иһитиннэрэр.