Оскуола дириэктэринэн анаммыт байыаннай дьайыы бэтэрээнэ Дьокуускай аҕаларын сэбиэтигэр чилиэнинэн киирдэ

Бу күннэргэ Дьокуускай куорат 13-с №-дээх оскуолатын Аҕаларын сэбиэтин мунньаҕа буолан ааста.

Оскуола аҕаларын сэбиэтин бэрэссэдээтэлэ А.Г. Саломатов ааспыт сыл устата ыытыллыбыт үлэ туһунан отчуоттаата уонна Сэбиэт быйылгы үөрэх дьылыгар үлэтин былаанын билиһиннэрдэ. Ону тэҥэ бу мунньахха Егор Попов салайааччылаах Дьокуускай куорат Аҕаларын сэбиэтин чилиэннэрэ кыттыыны ыллылар. Кинилэр быйыл туох үлэ ыытыллыахтааҕын, былааннарын, онно 13-с №-дээх оскуола көхтөөх кыттыыны ылыахтааҕын эттилэр. Саҥа үөрэх дьылыгар оскуола аҕаларын сэбиэтин бэрэссэдээтэлин уонна солбуйааччытын таллылар.

Киин куорат аҕаларын сэбиэтин чилиэннэр 13-с оскуола интернациональнай оскуола буоларын быһыытынан, ураты болҕомто ууруллуохтаах, бэйэ-бэйэҕэ эйэлээх сыһыаны бөҕөргөтөргө үлэ күүскэ барыахтаах диэтилэр.

«Мантан инньэ оҕону патриотическай иитиигэ, дойдутун иннигэр бэриниилээх киһини үүннэрэн таһаарарга аҕалар оруолларын үрдэтиигэ, элбэх тэрээһин ыытыллара былааннанар. Дьокуускай куорат аҕаларын сэбиэтэ араас элбэх оҕо үөрэнэр оскуолатыгар аҕалар күрэхтэрин тэрийиэххэ диэн этии киллэрдэ. Маннык тэрээһин өссө ханна даҕаны буола илик. Онон биһиги сотору кэминэн аҕалар оруолларын үрдэтэр уонна элбэх араас омук оҕолорун төрөппүттэрин тардар, уопсастыбаннай олоххо кыттыһыннарар курдук, күрэхтэһии тэрийэн ыытыахпыт», — диэн Иосиф Слепцов санаатын үллэһиннэ.

Санатан эттэххэ, соторутааҕыта бу оскуола дириэктэринэн оскуолаҕа үлэлиир уопуттаах, анал байыаннай дьайыы бэтэрээнэ Иосиф Слепцов анаммыта. Бу күн мустубут дьоҥҥо саҥа дириэктэри – Иосиф Слепцову билиһиннэрдилэр. Кинини бу күн Дьокуускай куорат Аҕаларын сэбиэтин президиумугар киллэрдилэр уонна ону туоһулуур дастабарыанньаны уонна значогу туттардылар.