Оскуола муҥхатыгар сүүстэн тахса куул балыгы ылбыттар

Быйыл Күөх Боллох барахсан мичик гыммыт. Оскуола муҥхатыгар 115 киһи сылдьан 100-тэн тахса куул көмүс хатырыктааҕы ылбыт. Бу ханна?

Бу көрөр бөскөйбүт, толору тэлгэммит собону оскуола оҕолоро кыттыылаах муҥхаҕа таһаарбыттар. Амма улууһун Эмис оскуолата улуус оскуолаларын ыҥыран муҥхалаппыт үһү диэн сонуну иһиттим дуу, истибэтим дуу диэт, тута оскуола дириэктэрэ Гаврил Захаровка төлөпүөннүү сырыттым.

— Оскуоланан муҥха үгэһин өссө отучча сыл анараа өттүгэр олохтообуттара. Кэлин, 2014 сыллаахха мин оскуола дириэктэринэн ананан баран улуус баҕалаах оскуолаларын ыҥырар буолбутум. Оҕолор төрүт үгэһи умнубаттарын, көлүөнэттэн көлүөнэҕэ бэриллэ турарын уонна саамай сүрүнэ, оҕо дьону, айылҕаны кытта алтыһарын туһугар уонча сыл устата Амма улууһун үөрэнээччилэригэр анаан тэрийэбит. Оскуолабыт үс күөллээх. Сыллата солбуйа сылдьан муҥхалыыбыт.

Быйыл тырааныспар кыаллыбакка, кыттааччы ахсаана аҕыйах – алта оскуолаттан барыта 115 киһи. Өрүс сүнньүгэр олорор нэһилиэктэр күөллэрэ суох, онон оҕолоругар муҥханы көрдөрөөрү, үөрэтээри Амма Наахара курдук ыраах нэһилиэктэн кытта сыллата айаннаан кэлэллэр.

Бары саба түмсэн үлэлиир хотуулаах, онон оҕо муҥхатыгар эбэбит көмүс хатырыгыттан куруук бэрсэр. Хаһан даҕаны муҥхаҕа сылдьыбатах оҕолор кэлэн нырыыһыт, бэчимэһит, анньыыһыт буолаллар. Күһүн эрдэттэн ыйыталаһан бараллар.

Үүнэр көлүөнэни бу төрүт үгэскэ, үлэҕэ-хамнаска сыһыарарбытыгар меценаттарбыт көмөлөрө сүҥкэн. Биһиги сүрүн меценаппыт – Эмис оскуолатын бүтэрбит, билигин бочуоттаах сынньалаҥҥа олорор юрист Владимир Петрович Константинов. Бу тэрээһиҥҥэ сыллата бэйэтин муҥхатын уларсан, иилээн-саҕалаан ыытара үөрүүлээх, — диэн Гаврил Дмитриевич кэпсиир.