Оскуола оҕолоругар “Өбүгэлэр оонньуулара” бэстибээл кыайыылаахтара быһаарылынна

Улуу Кыайыы 80 сылыгар аналлаах Баһылай Манчаары аатынан успуорт национальнай көрүҥнэрин киинигэр алтынньы 9-10 күннэригэр XXII «Өбүгэлэр оонньуулара» өрөспүүбүлүкэтээҕи бэстибээл буолан ааста.

Икки күн устата 11 улуустан талыы түһүмэҕин 37 кыайыылааҕа успуорт национальнай көрүҥнэригэр саамай күүстээх эдэр спортсмен аатын ылар иһин кииристилэр.

Үөрэнээччилэр үгэс буолбут көрүҥнэргэ: национальнай таҥастаах бэйэни билиһиннэриигэ, сахалыы ыстаныыларга, тутум эргииргэ, хапсаҕайга, мас тардыһыытыгар, “кириэс тэбии” ыстаныыга, хабылыкка, хаамыскаҕа күрэхтэстилэр. Барыта биирдиилээн зачет көрүҥүнэн ыытылынна.

Тыҥааһыннаах күрэхтэһии түмүгэр 9-10 кылаас кыргыттарыгар кыайыылаахтарынан буоллулар: 1 миэстэ – Айгуль Прокопьева, Чурапчы улууһа; 2 миэстэ — Ариана Тимофеева, Хаҥалас улууһа; 3 миэстэ — Лера Сергеева, Мэҥэ Хаҥалас улууһа.

9-10 кылаас уолаттарыгар чөмпүйүөнүнэн Өлүөхүмэ улууһуттан сылдьар Марк Никитин буолла; 2 миэстэни Дьокуускайтан Эркин Эркинов ылла; үһүс миэстэҕэ Чурапчы улууһуттан Марк Захаров таҕыста.

11 кылаас кыргыттарын ортотугар кыайыылаахтарынан буоллулар: 1 миэстэ – Хаҥалас улууһуттан Александра Захарова; 2 миэстэҕэ Эльмира Макарцова Чурапчы улууһуттан уонна 3 миэстэҕэ – Дьокуускайтан Юлия Ли-фу.

11 кылааска үөрэнэр уолаттарга 1 миэстэҕэ Сунтаар улууһуттан Николай Иванов таҕыста. 2 миэстэни Амма улууһуттан Степан Степанов уонна үһүс миэстэни Хаҥаластан Кирилл Павлов ыллылар.

Тэрийээччилэр бэлиэтээбиттэрин курдук, хас биирдии кыттааччы сатабылын, маастарыстыбатын толору көрдөрдө. Бэстибээл спортсменнары эрэ буолбакка, успуорт национальнай көрүҥнэрин сайыннарар уонна харыстыырга дьулуһар тириэньэрдэри түмэр, диэн иһитиннэрэр Ил Дархан, бырабыыталыстыба пресс-сулууспата.