Ааптар хаартыскаҕа түһэриитэ
Амма улууһун Сатаҕай нэһилиэгэр бырабыыталыстыба отчуотугар улахан сааланы толору киһи кэлбит.
Сатаҕайдар ырааҕынан эргитэн, киэҥник анааран, кыһалҕаларын уһуннук этинэр дьон эбит. Кириитикэ да баар. Ол эрэн, бары этэр дьон маннык сирэй көрсөн ирэ-хоро кэпсэтиини ахтыбыттарын, астыммыттарын биллэрдилэр уонна бырабыыталыстыба үлэтин биһирииллэрин туһунан эттилэр.
Сатаҕайга сүрүн кыһалҕалар манныктар. Дириэктэр Иванна Шишигина этэринэн, оскуола дьиэтэ эргэрэн, олус тымныы буолан, кыһын аайы санитарнай ирдэбилгэ эппиэттээбэккэ, сабыллан, тэйиччиттэн үөрэххэ көһөллөр эбит. Оҕолор да ыалдьаллар, учууталлар да доруобуйалара айгырыыр. Онон саҥа оскуоланы тутуу — тыын боппуруос. Билигин бырайыагын оҥорорго тиэхиньиичэскэй сорудаҕа оҥоһулла сылдьар. Бу кэнниттэн бырайыага оҥоһуллан, эспэртиисэни ааһан, дьэ, бырагыраамаҕа киирсиэхтээх.
Маны тэҥэ, олохтоохтор сүрүннээн уот лииньийэтин күүһүрдүүнү, гаас кэлиитин, биэлсэр-акушер пуунун тутууну, Бүтэйдээх-Сатаҕай суолун тутууну туруорсаллар.
Гаас кэлиитин туһунан бастакы бөлөх салайааччыта, экэниэмикэ миниистирэ Майя Данилова маннык хоруйдаата:
— Соторутааҕыта бу боппуруоска Ил Дархан мунньах тэрийбитэ. Онно »Сахатранснефтегаз» хампаанньа этии киллэрбитэ. Кинилэр Кыһыл Сыыртан магистральнай гаас ситимин тута сылдьаллар. Барыстарыттан нолуок төлүүллэр. Бу нолуок оннугар, харчыны Бүтэйдээх-Сатаҕай-Алтан хайысханан гаас ситимин тардарга, бырайыак оҥорорго ыытар туһунан этии киллэрдилэр. Онон бу хайысханан үлэ барар. Кэлимник быһаарыллыахтаах.
Оттон биэлсэр-акушер пуунун туһунан эттэххэ, өрөспүүбүлүкэҕэ сыл аайы сүүрбэччэ ФАП тутуллан киирэр. Сатаҕайдааҕы биэлсэр пууна 26-с уочаратынан сылдьар. Онон эһиил киирсиэн сөп.
Суолга элбэх ыйытыы киирдэ. Бүтэйдээх-Сатаҕай суола ханна да регистрацияламматах. Онон бырайыакка киирсэр кыаҕа суох. Икки улуус бииргэ үлэлээн, бырайыак оҥордохторуна, дьыала хамсыан сөп. Былырыын национальнай бырайыагынан өрөмүөннэммит Амма трассата өссө нэксиэлэммит курдук диэн эттилэр. Манна тутааччы гарантиятынан, эбии оҥорон, дэхсилээн биэриэхтээх. Лаборатория тахсан бэрэбиэркэлээбит, онно суол араҥатыгар кэһиллии баарын булбатах. Онон грейдер дэхсилээтэҕинэ, көнүөхтээх диэн тырааныспар министиэристибэтин үлэһитэ Егор Иванов хоруйдаата.
Маны тэҥэ, олохтоохтор ходуһаны оҥоруу, бэнсиин, сэлээркэ сыаната ыараханын, сүөһүнү иитиигэ племенной үлэни ыытыы, тыа хаһаайыстыбатыгар каадырдары бэлэмнээһин, балбаах сокуонун, о.д.а. туһунан ыйыттылар.
Түмүккэ улуус баһылыга Степан Кузьмин сатаҕайдар санааларын аһаҕастык этиммиттэрин иһин махтанна. »Сатаҕай — көхтөөх нэһилиэк. Оруннаах кириитикэни киһи ылыныахтаах. Үлэни ыытаары, дьон кыһалҕатын быһаараары салайааччы буоллахпыт. Сатаҕай нэһилиэгэ ырааҕын учуоттаан, олохтоох бүддьүөтү быйыл 2,1 мөлүйүөн солкуобайынан эптибит», — диэбитин, ытыс тыаһынан көрүстүлэр.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…