Оскуола таҥаһын сыанатын хонтуруолга ылыахтара

Госдуумаҕа үөрэх дьыла саҕаланыан иннинэ оскуола таҥаһыгар сыана төрүөтэ суох үрдүүрүн көҥүллээбэттэригэр көрдөһөн, Федеральнай антимонопольнай сулууспаҕа туһаайыы сурук ыытар санаалаахтар.

Бу туһунан Госдуумаҕа Үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин бэрэссэдээтэлэ Ярослав Нилов иһитиннэрдэ. Кини этэринэн, сыл аайы балаҕан ыйын 1 күнүн иннинэ оскуола таҥаһыгар ирдэбил улаатар, бу сорох атыыһыттары сыананы үрдэтэллэригэр тиэрдэр.

«ФАС-ка туһаайыы сурук ыытыам. Үлэһиттэр сыана үрдүүрүгэр эрдэттэн болҕомтолорун ууруохтара. Биһиэхэ үгэс курдук, ирдэбил улааттаҕына, сыананы сиэрэ суох үрдэтэн бараллар. Маннык гынар табыллыбат», — диэн дьокутаат ТАСС быһаарда.

Урут эспиэрдэр бэлиэтииллэринэн, быйыл оҕону оскуолаҕa бэлэмнээһиҥҥэ ортотунан 15-20 тыһ. солк. үп-харчы ороскуоттанара. Сыаналар бигэтик туралларын үрдүнэн, саҥа үөрэх дьылыгар оскуола таҥаһын сыаната 8-10% үрдүөн сөп.