Оскуола үөрэнээччилэрэ ГТО бэстибээлигэр мустуохтара

“Спортивные якутяне” өрөспүүбүлүкэтээҕи үөрэнээччилэр спартакиадаларын иитинэн, бэс ыйын 1-3 күннэригэр Дьокуускай куоракка ГТО бэстибээлэ ыытыллыаҕа. Тэрээһиҥҥэ Саха сирин араас муннугуттан 140-тан тахса оҕо мустуоҕа.

Эдэр спортсменнар тардыныыга, миэстэттэн ыстаныыга, сүүрүүгэ, харбааһыҥҥа, быраҕыыга уонна сымса буолууга ГТО нуорматын туттарарга холонуохтара. Бастыҥ спортсменнары дьупулуомунан, кырааматанан, мэтээлинэн, кубогынан наҕараадалыахтара.

Санатан эттэххэ, ГТО кыһыл, үрүҥ көмүс, боруонса бэлиэтин иһин оҕолор үөрэххэ киирэллэригэр эбии баал ааҕыллар. Онон оскуоланы бүтэрээччилэр ГТО-ну туттарарга интэриэстээхтэр.