Оскуола үөрэнээччилэрэ оптуобус тохтобулун киэргэппиттэр

Дьокуускай куорат Д.И.Ягодкин аатынан 19-с нүөмэрдээх оскуолатын үөрэнээччилэрэ социальнай педагог Саина Стручкованы кытта “19 оскуола” оптуобус сылаас тохтобулун киэргэппиттэр. Бу туһунан куорат үөрэҕин управлениетын Телеграм ханаала суруйар.

Тустаах оскуола Көтөр фабрикатын түөлбэтигэр баар. Оҕолор бэйэлэрин оскуоларын аатын сүгэр сылаас тохтобулга Саҥа дьыл тыынын киллэрбиттэр. Бу кыра киэргэтии киһиэхэ барытыгар бырааһынньыктааҕы настарыанньаны аҕалыа уонна кыһыҥҥы тымныы күннэргэ мааны, туспаҕай көстүүлүө диэн эрэнэллэр. Оҕолор оптуобус кэтэһэргэ бу оҥоһуллубут кыра киэргэтиини уонна куораппытын харыстааҥ, сыаналааҥ, ону тэҥэ, бэйэҕит уокуруккут туһугар түмсэргэ кыһаллыҥ диэн ыҥыраллар.

Оҕолор бу дьоҕус киэргэтиинэн Саҥа дьыл тыынын аҕаллахтара ити. Киһиэхэ кыра да наада дииллэрэ чахчы эбээт.