Оскуола үрдүкү кылааһын үөрэнээччилэригэр аналлаах “Мин бастакы идэм” бырайыак үлэтин саҕалаата

Балысханнык сайдар үлэ ырыынагын усулуобуйатыгар идэни талыы ыччакка сүрүн сорук буолар. Ураты айылҕа баайдаах, култуура нэһилиэстибэлээх өрөспүүбүлүкэҕэ эрэгийиэни сайыннарар квалификациялаах каадыр ирдэнэр. “Мин бастакы идэм” бырайыак үрдүкү кылаас үөрэнэччилэрин олоххо бэлэмниир уонна идэҕэ интэриэһи тардар, сайдар кыаҕы үөскэтэр.

Күн бүгүн “Мин бастакы идэм” бырайыак иитинэн өрөспүүбүлүкэ 21 үөрэҕин тэрилтэтэ 40 идэҕэ үөрэтэр. Тустаах бырайыакка графическай дизайн, программирование, сыыппара ускуустубата (анимацияны уонна комиксы киллэрэн туран), сыбаарка дьыалата, сити-пиэрмэр, сыыппара куратора, БАС оператора, мэдиссиинэ алын сиэстэрэтэ, оонньууну уонна төлөпүөн сыһыарыытын оҥоруу, быыһааччы о.д.а. идэлэр киирэллэр. Үөрэтэр кииннэр уонна үөрэх бырагыраамаларын толору испииһэгин бу саайтка көрүҥ: https://mpp.copp14.ru/

Үөһээ Бүлүү тиэхиникума оҕолору сыбаарсык, массыынаны өрөмүөннүүр силиэсэр, кузовы көннөрөөччү, быыһааччы идэлэригэр үөрэтэн эрэр. Бу туһунан идэҕэ урутаан бэлэмниир киин иһитиннэрэр.

Мииринэй куорат эбии үөрэхтээһинин киинэ оройуон нэһилиэнньэлээх пууннарыттан 40 уонна Өлөөн эбэҥки национальнай улууһуттан 5 оҕону икки ирдэнэр – баһаатай уонна сыыппара култуурата идэҕэ үөрэтэн эрэр.

Эрэгийиэннээҕи тиэхиньиичэскэй кэллиэс (Мииринэй к.) бары салааларыгар түөрт идэҕэ үөрэтэллэр: элэктэриичэскэй тэрили өрөмүөннүүр уонна хааччыйар монтер, тэрили хааччыйар уонна өрөмүөннүүр силиэсэр, сыбаарсык уонна массыына өрөмүөннүүр силиэсэр. Удачнай куораттан, Чернышевскай, Светлэй, Таас Үрэх, Алмаастаах бөһүөлэктэртэн уонна Сунтаар сэлиэнньэтиттэн 70 оскуола оҕото үөрэнэн саҕалаата. Холобур, алтынньы 29 күнүттэн, сынньалаҥ кэмигэр кэллиэс тимиринэн уһаныыга уһуйар мастарыскыайыгар Таас Үрэх 9-с нүөмэрдээх оскуолатын 10-11-с кылааһын үөрэнээччилэрэ практическай үөрэҕи аастылар.

Алданнааҕы политиэхиньиичэскэй тиэхиньикум тустаах бырайыагынан маннык идэлэргэ үөрэтэр: массыына өрөмүөннүүр силиэсэр, химическэй анаалыс лабараана, сыбаарсык. Алдан куоракка үөрэх бырагырааматын таһынан оскуола оҕолоругар “Киэһээҥҥи көхтөөх тэрээһин” диэн ааттаах кылаас таһынааҕы тэрээһиннэри ыыталлар. Бырайыак иитинэн оҕолор Н.А.Некрасов аатынан киин бибилэтиэкэҕэ, Алданнааҕы устуоруйаны-кыраайы үөрэтэр түмэлгэ, “Муус түһүлгэ” физкултуура-успорт комплексыгар сырыттылар.

Дьокуускай куораттан чугас эргин сытар улуустар үөрэнээччилэрэ куорат орто анал үөрэҕин кыһаларыгар кэлэн үөрэнэллэр. Ол туһунан сиһилии бу сигэнэн киирэн билсиҥ.

Санатан эттэххэ, “Мин бастакы идэм” бырайыакка Саха сирин 20 тыһ. диэри нэһилиэнньэлээх пууннарын оскуолаларын үөрэнээччилэрэ кыттар кыахтаахтар.
Манна кыттар туһугар төрөппүттэр, оҕолор кылаас салайааччытыгар биллэрэллэрэ ирдэнэр. Сиһилии иһитиннэрии бырайыак официальнай саайтыгар баар: mpp.copp14.ru. Эбии ыйытыылаах буоллаххытына бу нүөмэринэн төлөпүөннээҥ: +7 (924) 172-05-06.
Кууруска сурутуу номнуо бара турар! Идэҕэ сатабылы ылар кыах бэриллибитин мүччү тутумаҥ.