Оскуолаҕа дьиэҕэ үлэни ирдииллэрин тохтотуохтара дуо?

Дьокутааттар Судаарыстыбаннай Дуума күһүҥҥү мунньаҕар оскуолаҕа үгэс буолбут дьиэҕэ үлэни көтүрэр туһунан сокуон барылын киллэрэргэ бэлэмнииллэр. Бу туһунан Судаарыстыбаннай Дуума бэрэссэдээтэлин солбуйааччыта Владислав Даванков иһитиннэрдэ.

Кини этэринэн, көҕүлээһини педагогическай уопсастыбаны кытта дьүүллэһии кэнниттэн Судаарыстыбаннай Дуумаҕа көрүөхтэрэ.

«Күнү быһа үлэлиир оскуолаларга оҕолор уруок кэнниттэн бөлөҕүнэн билиилэрин чиҥэтэн, бырайыактары олоххо киллэриэхтээхтэр», — диэн Судаарыстыбаннай Дуума бэрэссэдээтэлин солбуйааччыта «Известия» хаһыакка  бэлиэтээтэ.

Дьиэҕэ үлэ билиҥҥи үөрэх  систиэмэтигэр билиини уонна сатабылы сайыннарарга көмөлөспөт, үксүгэр үөрэх бырасыаһа баарын курдук эрэ көрдөрөр. Даванков этэринэн, үгүс үөрэнээччи сорудаҕы аатыгар эрэ толорор, ол туһугар куйаар ситимин ресурстарын уонна Оҥоһуу өйү туһанар буолбут. Оттон учууталлар, дьиэҕэ үлэни үрдүнэн-аннынан хонтуруоллуур эрэ курдук тутталлар. Түмүгэр, үөрэх хаачыстыбата тупсубат, оттон оҕолорго уонна төрөппүттэргэ ноҕурууска улаатар.

РФ Үөрэхтээһинин миниистирэ Сергей Кравцов Илиҥҥи экэнэмиичэскэй пуорум кэмигэр кэпсэтиитигэр бэлиэтээбитинэн, үөрэппит матырыйаалы хатылааһын бары дойдуларга үөрэх бырасыаһын араарыллыбат сорҕото буолар. Кини этэринэн, урут үөрэх тэрилтэлэрэ дьиэҕэ үлэ кээмэйин бэйэлэрэ быһаараллара, итиэннэ букатын да суох оҥоруохтарын сөбө. Кравцов ону таһынан, быйыл балаҕан ыйын 1 күнүттэн дьиэҕэ үлэ кээмэйин уонна толоруутун уһунун туһунан биир кэлим ыстандаартар күүстэригэр киирбиттэрин бэлиэтээтэ.