Оскуолаҕа — бэртээхэй бэлэх

Дьокуускайга Д.И.Ягодкин аатынан 19  №-дээх оскуолаҕа үөрүүлээх күн буолла. Кыһаҕа эбии тутуу ыытыллыбыта. Ол түмүктэнэн, күүтүүлээх күннэрэ үүннэ.

Саҥа тутуу уопсай иэнэ 5 тыһ.кв.м., 326 оҕо үөрэнэригэр суоттаммыт.

Ил Дархан Айсен Николаев үөрэнээччилэри, учууталлары эҕэрдэлээн туран, оптуобустаналларыгар сэртипикээт туттарда.

—Манна сылдьан мин Дьокуускайга улахан сайдыы бара турарын көрөбүн. Биһиги оскуолаларга, социальнай эбийиэктэргэ, куорат инфраструктуратыгар уларыйыы барарын кэтээн көрөбүт. Бу 19-с оскуола саҥа эбии тутууламмытыттан наһаа үөрдүм. Билигин аны кыһаҕа оҕолор биир симиэнэнэн үөрэниэхтэрин сөп. Онно сөптөөх усулуобуйа тэрилиннэ. Бу дьоһун хардыынан буолар. Маннык аныгы ирдэбилгэ эппиэттиир, табыгастаах усулуобуйаҕа оҕолор үөрэхтэрин хаачыстыбата тупсарыгар эрэнэбин. Оскуола материальнай баазата үрдүк ирдэбилгэ эппиэттиир буолла, онон ситиһиилэр баар буолуохтаахтар. Оннук да буолуо, — диэн бэлиэтиир Ил Дархан Айсен Николаев.

Оскуола дириэктэрэ Алексей Иванов бырайыагы олоххо киллэрэргэ көмөлөспүт дьоҥҥо бука барыларыгар махтанна. Кини саҥа куорпус үөрэҕи далааһынныырга, табыгастаах усулуобуйаҕа дьарыктары ыытарга кыаҕы биэрэрин бэлиэтээтэ.

—Ил Дархан Айсен Николаевка, Дьокуускай куорат баһылыгар, үөрэх министиэристибэтигэр, тутааччыларга ис сүрэхпиттэн махтанабын. Саҥа дьылга, саҥа сылы көрсө бэртээхэй бэлэҕи туттубут!  Кыһабыт аныгы үйэ ирдэбилигэр толору эппиэттиир тиэхиньикэнэн хааччылынна. Өрөспүүбүлүкэбит, дойдубут өссө тупсарын туһугар саҥа усулуобуйаҕа биһиги элбэҕи ситиһиэхпит диэн эрэнэбин, — диэтэ кини.

Үөрүүлэрин оҕолор эмиэ үллэһиннилэр.

—Оскуолабыт кэҥээн биэрбититтэн үөрэбит. Саҥа кылаастарданыбыт, бэртээхэй саалаланныбыт, үҥкүүнэн дьарыктанар хостоннубут, футболлуур хонуулаах киэҥ-куоҥ успуорт саалаланныбыт. Аны билигин, химия уруогар уопут оҥорор кыахпыт улаатта, үҥкүү да туруоруохтара, күрэхтэһии бөҕө тэриллиэ, атын оскуола үөрэнээччилэрин кытары көрсүһүүлэр тэриллиэхтэрэ. Биһиги кылаас оҕолоро бары наһаа үөрдүбүт, — диэн этэр 9 кылааска үөрэнэр Ксения Салбиева.

Төрөппүттэр маннык уларыйыыны-тэлэрийиини үрдүктүк сыаналаатылар.

—Бу оскуолаҕа мин икки кыыһым үөрэнэр. Улаханым — онус кылаас. Кини оскуолатын бары тэрээһиннэригэр көхтөөхтүк кыттар. Успуордунан дьарыктанар, муусука үстүрүмүөннэригэр оонньуур. Кырам эмиэ тэрээһиннэри көтүппэт. Онон саҥа аактабай саала кыргыттарым  сайдалларыгар тирэх буолуо. Кыһабыт оҕо сайдарыгар көмөлөөх буолара саарбахтаммат. Улахан махтал, — диэн Людмила Докторова үөрүүтүн үллэһинэ.

Манна даҕатан эттэххэ, бу куорпус РФ Бэрэсидьиэнэ Владимир Путин көҕүлээбит «Үөрэх» национальнай бырайыак иитинэн тутулунна. Кылаастар аныгы тэрилинэн хааччыллыбыттар. Оҕолор үөрэнэллэригэр, сайдалларыгар табыгастаах усулуобуйа тэриллибит.

Үс мэндиэмэннээх оскуолаҕа оҕолор үөрэ-көтө кэлэллэр. Бастакы мэндиэмэҥҥэ мэдиссиинэ хоһо, остолобуой, бибилэтиэкэ, үлэ уонна химия уруогун хосторо, лингафоннай хос бааллар. Икискэ эбии үөрэхтээһин киинэ, медиа-киин, успуорт саалата, актовай саала бааллар. Үһүскэ — үҥкүү хоһо, биология, информатика кылаастара. Саҥа тутуу 5-11 кылаас оҕолоругар анаммыт. Онтон урукку тутуу алын сүһүөх кылаастар үөрэнэллэригэр бэриллэр. Онно былырыын хапытаалынай өрөмүөн ыытыллыбыт.

РФ Бэрэсидьиэнэ В.Путин көҕүлээһининэн, национальнай бырайыактарынан, Уһук Илини сайыннарыы бырагырааматынан 2018 сылтан Саха сиригэр 171 үөрэх эбийиэгэ тутуллубут. 2025 сылга өрөспүүбүлүкэҕэ өссө 13 оскуола тутуллан киирэрэ былааннанар.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаларга түһэриитэ, СИА