Оскуолаҕа тутта-хапта сылдьыы иһин сыана туруоруутун бырайыага аны күһүҥҥүттэн бары оскуолаларга киириэҕэ

Аны күһүҥҥүттэн оскуолаҕа тутта-хапта сылдьыы иһин сыана туруоруохтара. Тустаах докумуону нуорма-быраап аакталарын бырайыагын федеральнай порталыгар таһаарбыттар. РФ Үөрэҕириитин министиэристибэтэ бырайыак туһунан официальнай быһаарыыны биэрдэ.

— Арассыыйа Үөрэҕириитин министиэристибэтэ оскуола үөрэнээччилэрэ, ол иһигэр доруобуйаларынан хааччахтаах оҕолор тутта-хапта сылдьыыларын (поведение) сыаналааһын сүрүн киритиэрийдэрин быһаарда. Онно дьиссиппилиинэни тутуһуу, социальнай хардарыта сыһыан, оҕо личность быһыытынан хаачыстыбата, үөрэххэ көхтөөхтүк кыттара киирсэр.

Сыананы туруорааһын апробацията 2025-2026 үөрэх дьылыттан номнуо саҕаламмыта. Манна Арассыыйа сэттэ пилотнай эрэгийиэниттэн 89 оскуола кыттар, хас биирдиилэрэ тутта-хапта сылдьыы иһин сыананы туруоруу үс барыйааныттан биирин талбыттара. Эспэримиэн түмүгүнэн 2026 сыл балаҕан ыйын 1 күнүттэн биир модель олоххо киириэҕэ.

Ону тэҥэ, сыананы 1-11-с кылаас үөрэнээччилэригэр барыларыгар туруораллара былааннанар, билиҥҥитэ үөрэтэн көрүүгэ 1-8 кылаас үөрэнээччилэрин тутта-хапта сылдьыыларын эрэ иһин сыана туруораллар, — диэн РФ Үөрэҕирии министиэристибэтэ быһаарар.