Оскуолаларга чуораан оннугар “Щелкунчик” балет Саҥа дьыллааҕы муусуката тыаһыаҕа

Саамай аптаах, дьиктилээх Саҥа дьыл бырааһынньыгын көрсө, оскуолаларга чуораан тыаһын оннугар “Щелкунчик” балеттан композитор Петр Чайковскай муусукатын тыаһатыахтара. Ити туһунан дойду Үөрэҕириитин министиэристибэтин саайтыгар суруйаллар.

Бу аан дойдуга биллэр муусуканы оскуолаларга ахсынньы устата тыаһатыахтара. Маннык кыах Үөрэҕирии министиэристибэтэ Бүтүн Арассыыйатааҕы уус-уран айымньыны уонна гуманитарнай технологияны сайыннарар киини кытта кыттыгас “Чуораан оннугар – муусука”  бырайыак иитинэн баар буолла. Бырайыак оҕолор бары өттүнэн дэгиттэр сайдалларыгар, муусукаҕа сыстаҕас буола улааталларыгар, дойдубут уһулуччулаах композитордарын айымньыларын кытта билсэллэригэр туһаайыллар.