Оскуолаларга киинэ көрдөрөн саҕалаатылар

Саха сиригэр үс оскуолаҕа «Школьное кино» пилотнай бырайыак үлэлээтэ. «Экстра Синема» хампаанньа технологиятын көмөтүнэн, өрөспүүбүлүкэ нэһилиэктэрин уонна кыра куораттарын оскуолаларын оҕолоро аудиовизуальнай нэһилиэстибэ уонна нуучча киинэтин бастыҥ холобурдарыттан үөрэнэллэр.

«Пилотнай бырайыак  үөрэх министиэристибэтин кытта бииргэ үлэлэһэн, Дьокуускайга Саха политехническэй лицейгэ уонна Ньурба улууһун  Чаппанда сэлиэнньэтигэр, Мииринэй оройуонун Таас Үрэх сэлиэнньэтигэр тыа оскуолаларыгар саҕаланна. Сыл бүтүөр диэри оскуолаларга «Экстра Синема» технологиятын туһаныы  уопута ыытыллыаҕа, онтон салгыы дойду үрдүнэн кэҥэтэр, тарҕатар былааннаахпыт», — диэтэ «Экстра Синема» генеральнай дириэктэрэ Петр Чиряев.

Саха политехническэй лицейигэр сэттис кылаас үөрэнээччилэригэр «Рядовой Чээрин» киинэни көрдөрдүлэр. Бу Тимофей Сметанин айымньытынан уһуллубут байыаннай драма. Киинэ режиссера Дмитрий Кольцов үөрэнээччилэргэ киинэ ис хоһоонун билиһиннэрдэ. Сценарий суруллуутугар олук буолбут Егор Чээрин туһунан кэпсээни ааҕалларыгар сүбэлээтэ.

Үөрэнээччилэр да, учууталлар да киинэни тыыммакка да олорон көрдүлэр. Киинэ кэнниттэн оҕолор артыыс, режиссер, сценарист Дмитрий Кольцовы кытта кэпсэттилэр. Ким кэпсээни уонна сценарийы суруйбутун, артыыстары хайдах талбыттарын, киинэ уһуллуута төһө өр барбытын, о.д.а. ыйыттылар,  бүтэһигэр автографка илии баттатан ыллылар.

Оскуола дириэктэрэ Надежда Тимофеева кэлэр нэдиэлэҕэ тустуу тренерэ Дмитрий Коркин уонна олимпиада чөмпүйуөннэрин туһунан Михаил Лукачевскай «Триумф» киинэтин көрдөрөллөрүн туһунан иһитиннэрдэ. Киинэ көрдөрүүтүгэр ыалдьыттартан биирдэстэринэн киинэҕэ биир оруолу оонньообут лицей үөрэнээччитэ буолуоҕа.

«Оскуола киинэтэ» диэн пилотнай бырайыак быйыл кулун тутар ыйга саҕаламмыта, Арассыыйаҕа оҥоһуллар «Экстра Синема» киинэни көрдөрөр технологияны туһанан, Саха сиригэр үс оскуолаҕа барыта 1945 үөрэнээччи көрдө.

Бырайыак бэрэсидьиэн Владимир Путин көҕүлээһининэн олоххо киирбитэ. Санатан эттэххэ, өрөспүүбүлүкэҕэ  «Экстра Синема» 77 киинэ тыйаатыра баар буолан, тыа сиригэр олорор 118 000 киһи аныгылыы таһымнаах киинэни көрөр кыахтаахтар.

Сиһилии: https://www.sakha.gov.ru/news/16598