Оскуолаларга саҥа дуоһунастары киллэриэхтэрэ

Өрөспүүбүлүкэ үөрэҕин уонна наукатын миниистирин бастакы солбуйааччы Ньургун Павлов «Якутия24» ханаалга «Актуальное интервью» биэриигэ үөрэх кыһаларын штатнай кыраапыктарын федеральнай ирдэбиллэргэ сөп түбэһиннэрии туһунан кэпсээтэ.

«2021 сылтан Арассыыйатааҕы биир кэлим үөрэхтээһин систиэмэтэ тэрилиннэ. Федеральнай сокуоннар, федеральнай үөрэхтээһин стандартара уонна бырагыраамалар саҥа ирдэбиллэригэр сөп түбэһиннэрэн, оскуолаларга уонна орто идэҕэ үөрэнэр тэрилтэлэргэ үөрэх сүбэһиттэрэ, саҥа квалификация категориялара — педагог-методист, педагог-настаабынньык дуоһунастара  баар буоллулар, кылаастары салайыыга уонна куратордыырга төлөбүр олохтонно.  Арассыыйа Үөрэҕин министиэристибэтиттэн быйыл сайын модельнай штатнай араспысаанньаны, нормативы туттубут, балар типовой, сүбэлиир хайысхалаахтар. Улуустары кытта быһаччы үлэлиибит, уратыларын, баҕа санааларын учуоттуубут. Хас биирдии муниципалитекка хамыыһыйалар тэрилиннилэр», — диэн кэпсээтэ.

Ньургун Павлов каадыр кыраапыгар билигин методист саҥа дуоһунаһа киирбитин,  10 учууталга биир методист дуоһунаһа ирдэнэрин бэлиэтээтэ.

«Методист хас биирдии учуутал идэтийбит педагогическай компетенциятын сайыннарыыга быһаччы үлэлиир уонна туспа үөрэх суолларын сайыннарар. Үөрэх тэрилтэлэригэр уонна орто  оскуолаларга маннык дуоһунастары олохтуур  наада. Ону тэҥэ, саҥардыллыбыт стандарка сөп түбэһиннэрэн, «Основы безопасности жизнедеятельности» биридимиэт  «Основы безопасности защиты Родины» биридимиэтинэн солбуйуллубут. Министиэристибэ үөрэх чааһын ахсааныттан тутулуга суох, бу биридимиэккэ учуутал штатын олохтуур туһунан сүбэлиир», — диэн быһаарда.

Миниистири бастакы солбуйааччы үөрэх кыһаларын үбүлээһиҥҥэ сүрүн уларыйыы суоҕун тоһоҕолоото; үп-харчы үөрэнээччи ахсааныттан көрөн көрүллэр. Кыра оскуолалар өрөспүүбүлүкэ уонна федеральнай сокуоннарынан көмүскэллээхтэр. Өрөспүүбүлүкэ 627 үөрэх кыһатыттан 260 кыра оскуола, ол иһигэр 6 көһө сылдьар оскуола баар.

«Сорох муниципальнай тэриллиилэргэ үөрэнээччи ахсаана  аҕыйаан иһэр, кэлэр сылга үбүлээһин былырыыҥҥытааҕар аҕыйах буолуоҕа. Бу муниципальнай тэриллиилэр каадырдарын кыраапыгын онно сөп түбэһиннэрэн көннөрөргө күһэллиэхтэрэ», — диир Ньургун Павлов.